Kanukokamit anineq
Kanukokamut ilaasortaaginnarnissamut siunnersuut suliassanngortippoq
Kommuneqarfik Sermersuumi kommunalbestyrelsi aalajangerpoq kommuunit kattuffiannit aninissamut aalajangernerup atorunnaarsinnissaanut siunnersuut kommuunip aningaasaqarnermut ataatsimiisitaliaanut ingerlateqqinneqassasoq
Kommunit Kattuffiat, Kanukoka, Kommuneqarfik Sermersuumi kommunalbestyrelsip ileqquusumik marlunngornermi ataatsimiinerani eqqartorneqaqqippoq.
Tamanna pivoq Siumup aamma Atassutip kommunalbestyrelsimi gruppia kommunalbestyrelsip siorna septembarip qaammataani Kanukokamit aniniarluni aalajangernerata atorunnaarsinnissaanut siunnersuuteqareersorlu.
- Taamatut aalajangernermut tunngavigineqartut ilagivaat ‘Kommunit aamma Namminersorlutik Oqartussat akornanni isumaqatigiinniarnerit illugiiulluni ingerlanneqartaraluartut, pingasoqiusaalluni ingerlanneqartalernissaat, tassaassallutik Namminersorlutik Oqartussat, Kommuneqarfik Sermersooq aamma Kanukoka, taassuma kommunit sinneruttut pingasut sinniiserissallugu’.
Peter Davidsen kommuunip kommuneqarfiit kattuffiannit aninerata atorunnaarsinneqarnissaanut siunnersuuteqarluni ilaatigut taama allappoq.
Atuaruk: Sermersooq Kanukokami ilaasortaajunnaarpoq
Peter Davidsenilu ima nangippoq:
- Kisianni ilisimaneqalersutut Kommuneqarfik Sermersooq Namminersorlutik Oqartussanut toqqaannartumik immikkut isumaqatigiinniarsinnaanngilaq.
- Taamatuma kingunerissavaa kommunit akornanni nalimmassaanermut, ataatsimoortumik tapiissutinut aamma kommuunimi sulisut nalinginnaasumik akissarsiaqartitaanerinut, atorfeqartitaanerinut, soraarnerussutisiaqartitaanerinullu isumaqatiginninniarnerni Kommuneqarfik Sermersooq sunniuteqarsinnaassanngimmat, Peter Davidsen allappoq.
Kommunalbestyrelsip tamarmiusup suliap Aningaasaqarnermut Ataatsimiititami oqaluusereqqitassanngorlugu ingerlateqqinneqarnissaa aalajangerpaa.
Kanukokami aallartitat aqagu sisamanngornermi immikkut ataatsimiissapput, ilaatigut nutaamik siulittaasussamik toqqaasoqartussaalluni.
Tamanna pisussanngorpoq maanna siulittaasuusoq, Siumumeersoq Martha Abelsen, Kommuneqarfik Sermersuumi kommunalbestyrelsimi ilaasortaammat, kommunilu taanna kommunit kattuffiannit ukiup matuma naaneranit anisussanngormat.
Atuaruk: Kanukoka nutaamik siulittaasortaassaaq