Kanukokamit anineq
Kanukoka nutaamik siulittaasortaassaaq
Kommuneqarfik Sermersuup Kanukokamit anisinissaa toqqammavigalugu, Kanukokap maanna siulittaasua, Siumumeersoq Martha Abelsen, Kanukoka-mi siulittaasuujunnaalerpoq
Kommuunit kattuffiat, Kanukoka, ukiup matuma nikinneranit kommunit pingasunit kisimi ilaasortaaffigineqalersussaq, nutaamik siulittaasortaartussanngorpoq.
Tamanna pisussanngorpoq maanna siulittaasuusoq, Siumumeersoq Martha Abelsen, Kommuneqarfik Sermersuumi kommunalbestyrelsimi ilaasortaammat, kommunilu taanna kommunit kattuffiannit aniniarluni aalajangertuummat.
Kommuneqarfik Sermersuup Kanukokamit aninera pivoq kommunit Naalakkersuisuusimasullu kommunit akornanni 2015-imut nalingiissaarinissaq pillugu sivitsajaarsuarmik isumaqatigiinniareersullu.
Martha Abelsenillu toqqaannartumik Kanukoka tunuliaqutariunnaarniarmagu, Kanukokap siulersuisui februaarip qulingani aalajangersimapput aallartitat immikkut ittumik marsimi ataatsimiisinniarlugit.
Atuaruk: Sermersooq Kanukokami ilaasortaajunnaarpoq
Atuaruk: Sermersooq Kanukoka-mit aniniarpoq
- Siullermik, Kommuneqarfik Sermersooq kommunit kattuffiannit 1. januaari 2016-imit ilaasortaajunnaarniarluni nalunaaruteqarsimavoq. Maanna Kanukoka-mi siulittaasuusoq Martha Abelsen Kommuneqarfik Sermersuumi kommunalbestyrelsimut ilaasortaavoq, taamaattumillu siulittaasussarsiortoqartariaqassalluni kommunit ilaasortaaginnarniartut pingasuusut ilaannit pisumik..
- Siulersuisuni oqallisaasimavoq Martha Abelsen 2015-ip naanissaata tungaanut siulittaasuuginnarsinnaannginnersoq imaluunniit ukioq manna sapinngisamik piaartumik siulittaasumik nutaamik qinersisoqassanersoq 2016-imit Kanukokap nutaamik ilusilerneqarnissaanut piareersarnerit malittareqqinneqarnissaat eqqarsaatigalugu. Taanna kingulleq siulersuisuni orniginartinneqarneruvoq.
Taama Kanunoka tusagassiuutinut nalunaaruteqarpoq.
Siulittaasussamik nutaamik qinersinerup saniatigut, siulersuisuni ilaasortat pingasut qinerneqassapput, siulersuisuni ilaasortat marluk Inatsisartuni ilaasortanngorsimammata, soorlu aamma ilaasortaq ataaseq kommunalbestyrelsimit sulinngiffeqalermammat.
Aallartitat marsip 19-ani oqarasuaatikkut immikkut ataatsimeersuarnissaata saniatigut, Kanukokamit aalajangereerneqarsimavoq aamma aallartitat oktobarimi immikkut ittumik ataatsimeersuaqqissasut ilaatigut 2016-imi januaarip aallaqqaataanit kattuffiup malittarisassaanik ilusissaanillu nutaamik aalajangersaaffiusussamik.