KANUKOKA

Sermersooq Kanukoka-mit aniniarpoq

Kanukoka siunertamisut ingerlatsinngilaq, tamanna takuneqarsinnaavoq naligiissaarinerup aaqqissuuteqqinnerata ingerlasimanera, Kommuneqarfik Sermersuumi kommunalbestyrelsip marlunngorpat ataatsimiinnissaani oqaluuserisassani allassimavoq

IA, Demokrater, Sermersooq, kommunalbestyrelse
Kommuneqarfik Sermersuumi kommunalbestyrelisip marlunngorpat ataatsimiinnerani IA-p gruppiata Kanukoka-mut ilaasortaaneq oqaluuseritinniarpaa. IA-p gruppiata inassuteqaammini tikkuarpaa Kanukoka-p Sermersooq sumiginnarsimagaa, kommunillu ilaasortaanini iluaqutiginngikkaa.

Kommuneqarfik Sermersuumi kommunalbestyrelsi marlunngorpat ataatsimiileruni kommunip siunissami Kanukoka-mut ilaasortaaginnarnissaanik apeqqut oqaluuserineqassaaq. Tamanna takuneqarsinnaavoq kommunalbestyrelsip ataatsimiinnissaani ullormut oqaluuserisassani, taannalu filimi ilanngunneqartumi qallunaatut kalaallisullu atuarneqarsinnaavoq.

Kommunalbestyrelsimi IA-p gruppiani ilaasortaq Storm Ludvigsen 2014-imi septembarip 9-anni kommunalbestyrelsimut Kanukoka-p inissisimanera pillugu siunnersuuteqarpoq, siunertaralugu Kanukoka-mut ilaasortaaginnarnissaq aalajangiivigineqassasoq. Borgmesterip allattoqarfiata kommunalbestyrelsimut inassutigaa Storm Ludvigsenip siunnersuutaa kommunalbestyrelsimi oqaluuserineqassasoq.

Kanukoka-p iniatsisaani allassimavoq »peqatigiiffiup siunertaraa kommunit ataatsimut nalinginnaasumillu soqutigisaat isumagissallugit, kommunit suleqatigiinnerat nukittorsassallugu kiisalu kommunit ingerlatsineranni ikiussallugit«.

Takussutissiissutit malillugit IA-p gruppia isumaqarpoq Kanukoka-p siunertani naammassisinnaasimanngikkai, ilaatigut tamanna uppernarsarneqarluni naligiissaarinerup aaqqissuuteqqinnerata qanoq ingerlasimaneranik.

Aningaasaqarnermut Naalakkersuisup 2013-imi kommunip missingersuutaanit 20 millioner koruunit imaasiallaannaq peermagit, taamaasillunilu isumaqatigiissummi periutsit atuuttut unioqqutillugit, Kanukoka-mit qisuariartoqanngilaq, inassuteqaammi allassimavoq.

Isumaqatigiinniarnerup nalaani Kommuneqarfik Sermersuup piffissami sukkulluunniit malugisimanngilaa Kanukoka-p kommunit ataatsimut soqutigisaat isumaginiarai, tamatumani ilanngullugu nunami kommunit inuttunersaata aningaasaqarnersaatalu soqutigisai, taamaasillunilu Kanukoka ataatsimut kattuffittut atuussimanngilaq, kommunalbestyrelsimut inassuteqaammi allassimavoq.

Taamaasilluni naligiissaarinerup aaqqissuuteqqinneqarnissaanik isumaqatigiinniarnerni kommuni Kanukoka-mit tapersersorneqarsimanngilaq, politikkikkut allattoqarfikkulluunniit.

Kommuneqarfik Sermersuup aningaasaqarnikkut allannguuteqarnissarsua pineqaannanngilaq, taamatuttaarli pineqartigaaq Kommuneqarfik Sermersuup Naalakkersuisullu akornanni isumaqatigiissuteqariaatsip taamaasillunilu isumaqatigiissutit tatigineqarsinnaanerat missingersuusiorsinnaanerlu innarlerneqarlutik.

Isumaqatigiinniarnerit nalaanni Kanukoka, kattuffiullu aamma Sermersuup soqutigisaanik isumaginnissinnaaneranik piginnaaneqarnera piumassuseeqarneralu tatigiunnaarsimavarput.

Pissutsit imaasisimapput, aaqqissuusseqqinnerit uppernarsaatissaqanngitsumik, piviusunik tunngaveqanngitsumik kinguneqaatissanillu naatsorsuinertaqanngitsumik ingerlanneqarsinnaalerllutik. Aamma tamakku Kanukoka-p isummerfigisinnaanngilai. Kommuneqarfik Sermersuup soorunami piumasarisariaqarpaa Kanukoka paatsuugassaanngitsumik tapersersuissasoq, piviusorsiornikkut naapertuilluarnikkullu.

Takuvarpulli Kanukoka illua'tungeriit isumaqatigiinniarneranni tunngavissat sorsuutiginngikkai, ilami kommuninut tamanut naapertuuttumik atoruminartumillu aaqqiisoqarnissaanut akisussaassuseqarsimanani, inassuteqaammi allassimavoq.

IA-p gruppia isumaqarpoq kommunit sisamat akornanni ataqatigiissaarinermut ataatsimiititaliamik pilersitsisoqartariaqartoq, tassani kommunit qulaanit nakkutigineqaratik akisoorsuarmillu allaffissoratik ataatsimut sammisatik soqutigisatillu oqaloqatigalugillu ataqatigiissarsinnaallugit, Namminersorlutik Oqartussanut tunngatillugu, tassa akileraarutitigut naligiissaarineq suliassallu oqartussaaffiillu agguataarnerat eqqarsaatigalugit, aammalu akunnerminni kommunit killeqarfii akimorlugit misilittakkanik taarseeqatigiittarneq suleqatigiinnerlu eqqarsaatigalugit.

Ataatsimiititaliat tamakkua politikkerinik inuttaqarsinnaapput imaluunniit atorfilinnik taakkualuunniit akuleriisillugit, taakkualu pilersinneqarsinnaapput nammineq allaffeqarfivut atorlugit annertunerusumik aningaasartuutitaqanngitsumik. Ataatsimiititaliat imaluunniit oqaloqatiginnittarfiit aalajangersimasut, assersuutigalugu borgmesterit naapeqatigiittarfiat, pineqassappata allaffissornikkut suliassat kommunit sinnersaraallutik suliarisinnaavaat, IA-p gruppia siunnersuuteqarpoq.

Kanukoka-p malittarisassaani malillugit kattuffimmit aniniartoqarsinnaavoq allakkatigut, ukiup naatsorsuusiorfiusup naanissaa ukiumik ataatsimik sioqqullugu. Tassa imaappoq, kommuni kattuffimmit anisinnaavoq 2015-ip naanerani, taamaasillunilu sipaarutissat siulliit sunniussinnaapput 2016-imut missingersuummi.

Kommunalbestyrelsimut inassuteqaammi allassimanngilaq Kommuneqarfik Sermersooq Kanukoka-mit anini qanoq amerlatigisunik sipaarutigisinnaaneraa.

Powered by Labrador CMS