aatsitassat
Kalaallit rubiniutaat iluanaarutaasinnaaqaaq
Rubin nunatsinneersoq iipilitut ilusiligaq decemberip qulingat akitsorterussinikkut tuniniarneqartussanngorpoq
Rubini Qeqertarsuatsiaat eqqaanni nassaaq Los Angelesimi akitsorterunneqartussanngorpoq. Maannamut nalilerneqarnera malillugu 55.000 koruunit 82.000 koruunillu akornanni pissarsissutaasinnaavoq.
Atuaruk: Kalaallit rubiniutaat USA-mi tuniniarpaat
Rubinimik piginnittut tassaapput Nukajaraq Olsen Sisimiuneersoq aamma Hans Henrik Berthelsen Qeqertarsuatsiaaneersoq rubinimik Qeqertarsuatsiaat eqqaanni nassaartuupput. Taakku suliniutitut annikitsutut taaguutilimmik akuersissummik peqarput aatsitassanik ujarlernissamut atuinissamullu.
Rubini iipilitut ilusilersugaq Los Angelesimut aggustip naanerani nassiunneqarpoq qanittumilu akitsorterussisarfimmi Bonhamsimi akitsorterunneqassalluni. Rubini taanna Bonhamsimi oktoberimi novemberimilu saqqumilaartinneqarpoq maannalu Bonhamsip nittartagaa malillugu nalilerneqarpoq 55.000 koruunit 82.000 koruunillu akornanni pissarsissutaasinnaasutut.
- Tassa akitsorterussinermi aki aallartiffissaat. Taamatut akeqarluni tunineqassappat ajunngilaq tassami taama pisoqassappat aningaasartuutivut tamarmik matussuserneqassammata. Sooruni qaffasinnerpaamik akiliiumasoq toqqarumaarparput, Nukajaraq Olsen Sermitsiaq.AG-mut oqarpoq.
Akitsorterussineq decemberip qulingat pissaaq. Nukajaraq Olsen aamma Hans Henrik Berthelsen suliummik tassannga ingerlatsipput uppersarniarlugu suliniutit angisoorsuit atunngikkaluarlugit nunaqavissut aamma ujaqqanik erlinnartumik aningaasarsiuteqarsinnaasut.