aatsitassat
Kalaallit rubiniutaat USA-mi tuniniarpaat
Nukajaraq Olsen Sisimiuneersoq aamma Hans Henrik Berthelsen Qeqertarsuatsiaaneersoq rubinimik iipilitut ilusilersuisitsipput Los Angelesimi akitsorterussinermi tuniniarneqartussamik
Qeqertarsuatsiaat eqqaanni rubinisiorneq aamma suliniutit anginngitsut True North Gemsip suliniutaanit annikinnerit atorlugit ingerlavoq. Kalaallit marluk suliniummik annikitsumik taaneqartartumik suliniuteqartut rubinimik annertuumik nassaarput USA-milu maanna tuniniassamaalerlugu.
- Rubini nassaariuminaalaarpoq, taamaattoq 413 grami nassaaraarput taannalu iipilitut ilusilersorneqareerluni 283 gramimik oqimaassuseqalerpoq, Nukajaraq Olsen Sisimiuniit Sermitsiaq.AG-mut oqaluttuarpoq.
Nalunami kultisiorfimmit kulti 18 karat aamma pisiarineqarpoq taannalu kultimik pinnersaasiortartup Nicolai Appelip, Dronningip niaqorutaanik Nunatta kultianit suliaasumik sanasup, piluttatut ilusilerlugu suliaraa rubinimullu nipputsillugu.
Maanna kusanartuliaq taanna Los Angelesimut nassiuneqareerpoq akitsorterussisarfimmi Bonhamsimi decemberimi akitsorterunneqassalluni, tassanilu akitsorterussat ataasiakkaat nittartakkami malinnaaffigineqarsinnaapput. Taanna pitinnagu oktoberimiit decembarip tungaanut tamanut nittarsaanneqassaaq tamanna pereerpat tuniniarneqarnera aallartissalluni.
- Uani takutikkusupparput nunaqavissut aamma uagut aatsitassanik aningaasarsiorsinnaasugut. Suliniummik annikitsumik taaguutilimmik ingerlatsinissamut akuersissummik peqarpugut avammut niuerutiginninnissamut akuersissutitalimmik, Nukajaraq Olsen oqaluttuarpoq.
Akitsorterussineq eqqaaneqareersutut oktoberimi pissaaq rubinilu maanna Los Angelesimut anngutereersimalerpoq.
- Qanoq akeqarumaarnersoq suli naluarput, soorunami aki qaffasinnerpaaq anguniarumaarparput, Nukajaq Olsen oqarpoq.