kajumissutsimik sulisut
Kalaallit Røde Korsiat nutaamik siulersuisoqalerpoq
Ukiut arfineq-pingasut qaangiuttullu Tove Bildorf siulittaasutut tunuarniarluni aalajangerpoq
Kalaallit Røde Korsiata (KRK) sinniisutut aallartitat oktobarip 23-anni ataatsimiinneranni peqatigiiffik siulersuisunik nutaanik qinersisoqarpoq, ilaatigullu siulittaasoq taarserneqarpoq.
Tove Bildorf ukiut arfineq-pingasut siulittaasooreerluni tunuarpoq.
Atuaruk: Kalaallit Røde Korsiat nutaamik siulersuisoqalersoq
Aalajangerneq tussunngunartoq
- Kalaallit Nunaanni atugarliornerusunut ukiorpassuarni sullissereerluni aalajangerneq tussunngunarpoq. Kisianni Tovep soraarninngornini meeqqani, ernuttani ernutaqqiutinilu ilagalugit atorniarpaa, peqatigiiffik ilisimatitsivoq.
Siulittaasoq nutaaq
Christina Tønder Bell siulittaasunngorpoq, taanna Københavnimi Dansk Røde Korsimi siulittaasup tulliusimavoq.
Lissi Olsen ukiorpassuarni siulersuisuneereerluni aamma qinigassanngorteqqinngilaq. KRK-p aamma Lissi Olsenip inatsisilerinermut tunngatillugu ilisimasarpassui maqaasissavai, peqatigiiffik naqissusiivoq.
Atuaruk: Kaffinik tuniniaanermit Kalaallit Røde Korsiat 75.000 koruuninik tunineqarpoq
Siulersuisunut ilaasortanngorput tassaapput, Karo Thomsen Fleischer, Ilulissat, sinniisut Anette Jørgensen, Nuuk, kiisalu Lisbeth Kreutzmann Petersen, Maniitsoq.