Sunday, October 22, 2017 - 14:54

Kalaallit Nunaanni takorluuikkersaarutitut filmiliaraq takuteqqaarneqarpoq

Nuummi filmfestivalertitsinermi 'Akornatsinniittut - Tarratta Nunaanni' siullermeerutaasumik takutinneqarpoq

Filmi takorluukkersaarusiaq 'Akornatsinniittut - Tarratta Nunaanni' ippassaq arfininngornermi kulturikkut illorsuarmi Katuami Nuummiittumi siullermeerutaasumik takutinneqarpoq.

22-nik ukiulik filmiliornermi ilitsersuisartoq, Marc Fussing Rosbach, filmiliortuuvoq, filmillu siullerpaamik takutinneqarnera nuannaarutigaa.

- Ullut kingulliit pissaganermut iluamik sininneq ajorpunga. Unnuarli kiisami iluamik sinilluarpunga, taanna Sermitsiaq.AG'mut oqarpoq.

Atuaruk: Nunarput nunat tamalaat akornanni filmfestivalertitsissaaq

Nillernera unammillernarsimasoq

Nammineq filmi allatarisimavaa, ilitsersuiffigalugu, inuttaaqataalluni, nipilersuusersorlugu, killuisuullunilu kusassaasuuvoq.

- Januarimi immiussinerit aallartippagut februarimilu naammassilluta. Filmi februarimiillu allanngortitserlugulu killorsimavara. Ilulissani filmiliorfigisatsinni nillernera unammillernarnerpaasimavoq. Filmit tigulluarneqangaatsiarnera assut nuannaarutigeqaara. Filmillu takutinnerani inuit qisuariaataat tusaallugit nuanneqaaq, taanna oqarpoq.

Ilanngullugu paasissutissiaraa, filmip nunani allani takutinneqarnissaa misissuiffigineqartoq.

Filmiliassap tullia

Filmiassallu tullia Marc Fussing Rosbach'ip suliaralugu aallartereersimavaa.

- Suna samminerlutigu massakkut oqaatigisinnaanngilara. Nipilersuusersorneralu aallartereersimavara isumassarsioreerlungalu, taanna erseqqissaavoq, oqaatigaalu filmi allaanerussasoq.

- Siunissamilu 'Akornatsinniittut - Tarratta Nunaanni' nanginneqarumaarpoq, taanna ilassuteqarpoq.

Nuuk Ilulissallu

Marc Fussing Rosbach'ip suliamik pimoorussilluinnaraani angusaqartoqarsinnaasoq takutikkusullugu oqaluttuaraa.

- Filmiliorniarneq oqitsuinnaasimanngilaq, suliarinera nalaani kisimiittarsimaqaanga. Taamaammat taamatut suliaqartilluni piumassuseq pisariaqartorujussuuvoq, suliallu pimoorulluinnaraanni angusaqarfiusinnaasoq innuttaasunut takutikkusussimavara. Naggataanimi iluatsikkumaarpoq, Marc Fussing Rosbach oqarpoq.

Filmi Nuummi Ilulissanilu 26. oktober'imiit takuneqarsinnaalissaaq.

Allaaserisap ataani assit takukkit

Filmi 'Akornatsinniittut - Tarratta Nunaanni' Katuami arfininngormat siullerpaamik takutinneqarpoq
Assi.: Leiff Josefsen
Assimi takuneqarsinnaapput Marc Fussing Rosbach filmimilu pingaarnertut inuttaasoq Casper Bach Zeeb
Assi.: Leiff Josefsen
Filmi nalunaaquttap akunnerini marlungajanni sivisissuseqartoq kulturikkut illorsuarmi Katuami takutinneqarpoq
Assi.: Leiff Josefsen
Filmip takutinneqannginnerani Marc Fussing Rosbach ilaquttanilu
Assi.: Leiff Josefsen
Casper Bach Zeeb (talerpiani) filmimi pingaarnertut inuttaasoq
Assi.: Leiff Josefsen
Filmi Nuummi Ilulissanilu takuneqarsinnaassaaq
Assi.: Leiff Josefsen
Seneste nyheder / Nutaarsiassat kingulliit