Juullimut ikiorsiissutinik aatsaat taama amerlatigisunik agguaassisoqarpoq

Pisarneq malillugu KRK Nuuk ilaqutariinnut meerartalinnut ikiuutinik agguaassivoq. Ukioq manna 561.500 koruunit tunniunneqartut juullilernerani agguaassisoqartalermalli aatsaat taama annertutigipput.

Ukioq manna ilaqutariit 226-t kisermaallu qinnuteqartuupput juullimut taperneqarusullutik. Taakkunani ilaqutariit 200-it katillugit 435-nik meerartallit juullimut tapiissutiserusullutik qinnuteqaateqarsimapput.

Qinnuteqartuni kikkut juullimut atatillugu ikiorsiissutinik tunineqassanersut Nuummi Inunnik Isumaginnittoqarfik suleqatigalugu aaliangersaaffigineqarpoq.

Atuaruk: Nuummi ilaqutariit 200-t juullimut ikiorneqarnissamik qinnuteqarput

Akiliut immikkuullarissoq

Meeqqamut ataatsimut 1000 koruuninik inersimasumullu 250 koruuninik tapiisoqartarpoq.

- Nuummi atornikuerniarfimmi kajuminnertik tunngavigalugu sullissisartut sulinermik kingunerisaanik taama ilaqutariit meerartallit amerlatigisut juullilernerani tapiissutisisinnaasimammata assorsuaq nuannaarutigaat, Kalaallit Røde Korsiani allaffeqarfimmi pisortaq Kirsten Mortensen oqarpoq.

Ikiorsiissut kortinngorlugu tunniunneqartarpoq, pisiniarfinni amerlanerni atorneqarsinnaasunngorlugu aaqqinneqarsimasoq. Taamaallaalli imigassamut tupamullu atorneqarsinnaanngilaq.

Ilaqutariit ataatsit kisimik 7.250 koruuninik annertussusilikkamik tunineqarput minnerpaamillu 1.250 koruuninik tunisisoqarluni.

Ukioq manna taama annertutigisumik agguaassisoqarsinnaaneranut pissutaavoq atornikuerniarfimmi isertitat saniatigut Nuummi aningaasaateqarfiit suliffeqarfiillu kiisalu Inussivimmi juullilerneranut atatillugu niueqateqarnermik tapiisuteqartoqarsimanera 10.000 koruuninik.

NunaFonden sinerissami tapiivoq

Kalaallit Røde Korsiata immikkoortortaqarfiini Ilulissani, Maniitsumi, Sisimiuni Qaqortumilu Inunnik Isumaginnittoqarfiit peqatigalugit aamma koorinik agguaassipput.

Ukioq mannali saniatigut tamarmik immikkut NunaFondip Aningaasaateqarfianiik 15.000 koruuninik tapiissutisipput. Taamaalillutik ilaqutariinnut amerlanernut ikiuutinik agguaassisinnaanngorlutik.