piitsuussuseq
Nuummi ilaqutariit 200-t juullimut ikiorneqarnissamik qinnuteqarput
Nuummi aatsaat taama annertutigisumik aningaasanik juullimut ikiuutinik agguaassisoqartoq. Ilaqutariit ikiorneqartut akiliut immikkut ittoq atorlugu pisiniarsinnaapput
Pisarneq malillugu KRK Nuuk ilaqutariinnut meerartalinnut ikiuutinik agguaassivoq. Ukioq manna agguaassinermi 400.000 koruunit tunniunneqartut juullilernerani agguaassisoqartalermalli aatsaat taama annertutigipput.
Qinnuteqartuni kikkut juullimut atatillugu ikiorsiissutinik tunineqassanersut Nuummi Inunnik Isumaginnittoqarfik suleqatigalugu aaliangersaaffigineqarpoq.
Korti akiliut immikkut ittoq
Ukioq manna ilaqutariit 200-t kisermaallu qinnuteqartuupput juullimut taperneqarusullutik. Taakkunani ilaqutariit 180-it katillugit 340-nik meerartallit juullimut tapiissutiserusullutik qinnuteqaateqarsimapput.
Meeqqamut ataatsimut 1000 kroruuninik inersimasumullu 250 koruuninik tapiisoqartarpoq.
Aningaasaq kortinngorlugu tunniunneqartarpoq pisiniarfinni amerlanerni atorneqarsinnaasunngorlugu aaqqinneqarsimasoq. Taamaallaalli imigassamut tupamullu atorneqarsinnaanngilaq.
Atornikuerniarfimit aningaasarpassuit
Ilaqutariit ataatsit kisimik 7.250 koruuninik annertussusilikkamik tunineqarput minnerpaamillu 1.250 koruuninik tunisisoqarluni.
- KRK Nuup taama annertutigisumik agguagarsititsisinnaaneranut pissutaalluinnarpoq kajumissusertik tunngavigalugu Nuummi immikkoortortaqarfiup atornikuerniarfiani sulisorpassuaqarsimanera, immikkoortortaqarfik taama nalunaarpoq.
Atuaruk: Kajumissutsimik suliaqarnermut Sisimiut rekortiliisoq
Nunafonden sinerissami tapiivoq
Kalaallit Røde Korsiata immikkoortortaqarfiini Ilulissani, Maniitsumi, Sisimiuni Qaqortumilu Inunnik Isumaginnittoqarfiit peqatigalugit koorinik agguaassipput.
Ukioq mannali saniatigut tamarmik immikkut Nunafondip Aningaasaateqarfianiik 15.000 koruuninik tapiissutisipput. Taamaalillutik ilaqutariinnut amerlanernut ikiuutinik agguaassisinnaanngorlutik.
Atuaruk: Kommunini allani suliffissaaleqisut Sermersuumut nutserarput