kommunimut qinersineq
Jens-Erik Kirkegaard: Demokraatit silatusaanngillat
Kommuneqarfik Sermersuumi Demokraatit Siumumik suleqateqannginnissartik aalajangiutereerpaat. Taama siusitsigisumik aalajangerneq partiimit takutitsilluarnerunngitsoq, kommunimut qinigassanngortittoq Jens-Erik Kirkegaard (S) isumaqarpoq
Sermitsiaq.AG-p sapaatiummat allaaseraa, kommunuimut qinersisoqarnerata kingorna Kommuneqarfik Sermersuumi Demokraatit Siumumik suleqateqarniaratik nalunaarutigaat.
- Suleqatigiissinnaanermut toqqissisimananngilluinnarpoq taamak aalassassimaartigisunik isumaqatigiinngitsigisunillu suleqateqarnissaq, tamatumalu kinguneranik Demokraatit Kommuneqarfik Sermersuumi aaliangerluinnarsimavugut nalunaarutigalugulu ersarissumik, Kommuneqarfik Sermersuumi Inuit Ataqatigiit suleqatigissallugit toqqissisimanarnerutikkatsigu, siunertaralugulu ukiut sisamat tullinnguuttut suleqatigeqqikkusullutigit, Randi Vestergaard Evaldsen ilaatigut oqarpoq.
Atuaruk: Kommuneqarfik Sermersuumi Demokraatit Siumut suleqatigiumajunnaarpaat
Silatusaarnerunngitsoq
Siumumeersup Jens-Erik Kirkegaardip kommunimut qinersinermut Sermersuumi sassartup, Demokraatit aalajangernerat 'silatusaarnerunngitsutut' oqaatigaa.
- Ajuusaarnarpoq qinersisartut suli taasinngitsut Demokraatit aaliangereersimammata, uanga ima nalilerpakka, tusagassiuutini qulequttat tunngavigalugit aaliangertut, Kommuuneqarfik Sermersuumi pitsaanerpaaq tunngaviginagu, Jens-Erik Kirkegaard tusagassiuutinut nalunaarummi allappoq.
Periarfissat ammatikkaat
Taasinerit kisinneqareerpata partiit akornanni isumaqatiginninniartoqassasoq, taassuma erseqqissaatigaa.
- Taama siusittigisumi aalajangerneq pitsaasumik qinersisartunut takutitsinerunngitsoq isumaqarpunga. Isumaqartuaannarama periarfissat tamaasa ammatinneri, isumaqatigiinniarnerit tungaanut, kommunitsinnut, nunatsinnut inuinullu pitsaanerpaasoq. Siusinaartumik aaliangernerit isumatusaarnerunngillat, Jens-Erik Kirkegaard oqarpoq.