Kommuunimut qinersineq 2017
Kommuneqarfik Sermersuumi Demokraatit Siumut suleqatigiumajunnaarpaat
Sammiveqannginneq, partiip iluani eqqissiviilliornerit, isummersornerit assigiinngitsorujussuit, Demokraatit siulittaasuata Randi Vestergaard Evaldsenip, Siumut taama oqaluttuaraa. Taamaammat Kommuneqarfik Sermersuumi Demokraatit IA-mut suleqatiginneqqikkusupput.
Randi Vestergaard Evaldsenip Siumut pillugu ima oqaaseqarpoq:
- Suleqatigiissinnaanermut toqqissisimananngilluinnarpoq taamak aalassassimaartigisunik isumaqatigiinngitsigisunillu suleqateqarnissaq, tamatumalu kinguneranik Demokraatit Kommuneqarfik Sermersooq-mi aaliangerluinnarsimavugut nalunaarutigalugulu ersarissumik, Kommuneqarfik Sermersooq-mi Inuit Ataqatigiit suleqatigissallugit toqqissisimanarnerutikkatsigu, siunertaralugulu ukiut sisamat tullinnguuttut suleqatigeqqikkusullutigit.
Randip oqaatigaa, Demokraatinut qinersineq, Demokraatinut qinersinerummat, assorulluta sulissutigissavarput, pingaartitatta, politikkitta anguniakkattalu piviusunngortinnissaaq. Tamanna nalilersorsimavaat, arlariinnillu nalilersuineq tunngaveqarsimalluni.
- Siullermik oqaatigerusuppara, naammagisimaanngilluinnaratsigu Siumut tapersinngimmagu, pikkorissuseq tunngavigalugu siulersuisuni ilaasortanik toqqaasarneq, suliffeqarfinni Kommuneqarfik Sermersooq piginneqataagaangat. Siumut piumasarivaa, massakkut atuuttoq, tassalu Kommunalbetyrelsini ilaasortat issiaviit qaffasissut tigussagaat, Demokraatillu tamanna peqataaffigisinnaanngilaat, isumaqaratta pikkorissuseq tunngavigalugu siulersuisoqarnissaq pissusissamisoortuusoq, Randi Vestergaardi, Sermitsiaq.AG-mut ilanngutassiamini allappoq.
- Aappaattut ernumatigivarput Siumut iluminni avissaartuunnerat eqqissiviilliornerallu, Siorarsiorfik pingaartumik pillugu. Demokraatit Siorarsiorfinnut tapersiipput, isumaqanngilagullu pissusissamisoortoq partiimi suleqatigiinnissamut periarfissiissalluta, Nunatsinni illoqarfiit pingaarnersaata pilersaarutaanut, partiip siulittaasua tapersiisinnaanngitsorluunniit, iluarisimaarnagulu. Kommuneqarfitta pisariaqartippaa inerisaaneq, sinnattut, pingaartitallu, killormuuaniunngitsorlu.
Qinigaaffiit marluk ingerlanerini tatigeqatigiilluta suleqatigiilluarlutalu IA-kkut kommuneqarfitsinni suleqatigisimavagut, Randi Vestergaard Evaldsen oqarpoq.