aatsitassat
Isumaginninnikkut akisussaaqataaneq aatsitassarsiornerup iluani nuannaartorineqalersimavoq
Ingerlatitsiviit arlallit suliniutiminni nunaqavissut suleqatiginissaat pingaaruteqartippaat
Nangaanani oqariartartup Greg Barnesip Tanbreezimeersup erseqqarinnerpaamik oqaatigaa.
- Aatsitassanik piiaaviit nuna piiaaffigiinnariarlugu qimaassanngillat, Københavnimi Kalaallit Nunaanni aatsitassarsiorneq pillugu ataatsimiisitsisoqarmat oqarpoq.
Atuaruk: Aatsitassanut suliniutinut aningaasaliissussat nutaat
Pissuserissaarneq silatusaarneruvoq
Piiaafiit nunaqavissunit sunniuteqarluarsinnaaneri qanoq qulakkeerneqassanersut Inatsisartuni ilaasortaq Kelly Berthelsenip (IA) apeqqutigimmagu taama akissuteqarpoq.
Aatsitassarsiortoqartillugumi nunaqavissut iluaqutigigaarneq ajoraat siornatigut misigineqartareertoq taassuma tikkuarpaa.
Nunaqavissunut pissuserissaarneq attaveqarluarnerlu silatusaarnerusoq Greg Barnesip nassuiarpaa.
Qulaaniit naqereerlugit naalangaaniarluni qangakkunni suleriuseqarneq inuiaqatigiinnit akuerineqaratillu suliniutinut akerliulersitsisarput.
Atuaruk: Akuersissutit sukkanerusumik suliareqquneqarput
Nunaqavissut Hudsonip sulisorerusuppai
Ingerlatitsiviit ataatsimiinnermi peqataasut arlaqartut inuiaqatigiinnut sunniuteqarluartumik pilersaaruteqarlutik saqqummiipput.
- Anorthosimi piiaaffimmi sulisorineqartut 80%-ii nunaqavissuussasut naatsorsuutigaarput, Hudson Ressourcemi pisrotaq Flemming Knusen oqarpoq.
Sanaartornermi Nunatsiinni suliassaqaqimmat sulisussarsiniarneq unammillernassasoq erseqqissarpaa.
- Suliffissuarput orniginartuussammat sulisussarsissajunnarsisugut qularinngilara pisortaq oqarpoq Sisimiunilu aatsitassalerinermik ilinniarfik qanimut suleqatiginiarnerarlugu.
Nunaqavissut piniartut pisaannik nerisaqartitsinissaq sulissutigineqartoq aamma eqqaavaa.
Atuaruk: Kalaallit aatsitassaataannut soqutiginninneq annertooq
Maniitsumi zinki
Misissuiffik North American Nickel nunaqavissunik peqataatitsinissaq aamma pingaartippaa. Ingerlatitsivik Maniitsumi misileraalluni piiaanissamik akuersissuteqarpoq.
- Misissugassanik piiaanitsinni nunaqavissut 25-it sulisoraagut. Sulisugullu pikkorissarneqartarlutik, Ingerlatitsiviup pisortaanera Mark Fedikow oqarpoq.
Hudson Ressourcetuulli taakku aamma piniartut aalisartullu pisaannik nerisaqartitsinissartik naatsorsuutigaat.
- Taassuma saniatigut nunaqavissunut ilinniartitsineq qujassutitut tunniunneqassasoq pingaartipparput, Mark Fedikow oqarpoq.
Sisimiunittaaq aatsitassalerinermik ilinniarfik suleqatigalugu ilinniartut praktikkerfissaqarnissaat sulissutiginerarpaat.
Suliniutillu ammasumik ingerlanneqarnissaanut inuiaqatigiinnut ataatsimiisitsisoqartassasoq naggataatigut oqaatigalugu.
Ataatsimiisitsineq Industriens Husimi Arctic Cluster for Raw Materialsimit aaqqissuunneqarpoq. Taakku sulisitsisut peqatigiiffiat , Dansk Industri Danmarks Tekniske Universitetetilu suleqatigaat.