Isiginnaagassiamit assit: Coster-Waldau angalaalerpoq

Uani qaammammi Sonnerpgaard Godsimi Sjællandimiittumi Nalusuunerup Taarnerani takuteqqaarneqarnerata iluatsilluarneratalu kingorna, Teater Solarisip isiginnaagassiaq angallatilerpaa.

Isiginnaartitsinerup tullia marsip 30-ani 31-anilu Aalborgimi Teater Nordkraftimi pissaaq. Taassuma kingorna aamma Københavnimi Nationalmuseetimi katillugu sisamariarluni apriilip sisamaani tallimaanilu takutinneqassaaq.

Tassani Teater Solaris aamma Inuit Theatre Company suleqatigiipput.

Atuaruk: Inuit aamma vikingit pillugit isiginnaagassiami pissanganartumi Coster-Waldau ilaasoq

Tulluusimaartut
- Isiginnaagassiaq aamma Inuit Thatre Companyp Teater Solarisillu suleqatigiinnerat tulluusimaarutigisorujussuuarput. Siunissami kalaallinik isiginnaartitsisartunik aamma eqqumiitsuliortunik amerlanerusunik suliaqaqqinnissarput neriuutigaarput. Tamanna Sananda Solarisimut uannullu ukiuni amerlasuuni takorluugaanikuuvoq piviusunngortoq, isiginnaartitsisartoq Nûkaka Coster-Waldau naqissusiivoq, taanna isiginnaagassioqataallunilu isiginnaartitsisuuvoq.

Nalusuunerup Taarnerani nipilersornertaqarluni Villads Villadsenip taalliaanit, 'Qasapip ullui kingulliit', tunngaveqarpoq. Taallaq qallunaatsiaat Kalaallit Nunaanniikkunnaarnerannut tunngasuuvoq.

Tusaamasarpassuit
Nûkaka Coster-Waldauip saniatigut kalaallit isiginnaartitsisarnerannit tusaamaneqarluartut peqataapput, Mike Fencker Thomsen aamma Ujarneq Fleischer, nipilersugartaalu Ole Kristiansenimit allanneqarpoq.

Isiginnaartut isiginnaartitsisarfiup Facebookiani annertuumik nersualaarinnipput:

'Isiginnaagassiaq kusanarluinnartoq misigissuseqarnartorlu. Aammalu Nûkakamit takutitsilluarnerujussuaq'. 'Takutitsineq assersuussassaanngitsoq'. Aamma 'Ippassaq nuannerluinnartumik misigisaqarpunga. Ole Kristiansenip nipilersugaa suli timinniippoq. Misigisaq kingusissukkut puigugassara,' oqaaseqaatit ilaat taama nipeqarput.

Isiginnaagassiamit assit uani ataani takukkit