Ironbarkip atsiorneq pissarsiaraa

Ironbark A/S-ip maanna pappiara pingaartupilussuaq pissarsiaraa. Tassalu nunatta avannaarsuani tikikkuminaaqisumi Citronenfjordimi zinkimik aqerlumillu qalluinissamut isumaqatigiissut atsiugaq.
Suliniut angisooq
Ironbark akuersissut aqqutigalugu ukiuni 30-ini zinkimik aqerlumillu piiaanissamut pisinnaatitaavoq, akuersissullu ukiunut 50-inut sivitsorneqarsinnaavoq.
Suliniut maanna aatsitassanik qalluiffissanik pilersaarutini annerpaanut ilaavoq.
Aatsitassanullu Naalakkersuisoq Múte Bourup Egede (IA) nuannaaqaluni atsiorpoq.
- Iluarisimaarinneqalunga qalluinissamut akuersissut, qalluinissamut aggersumut patajaatsumik sinnaakkusiisussaq atsiorpara, taanna oqarpoq.
ATUARUK: Ironbark sakkortuumik isornartorsiorneqartoq
Aningaasassarsiussaaq
Ukiup tullia pilersaarusiornermi erseqqissaasiornernut aningaasaliisussarsiornermullu atorneqassasoq Ironbarkip naatsorsuutigaa.
Suliffeqarfiup ukiup ataatsip matuma siorna tusarniaanerilli nalaanni, aningaasaliisinnaasunik siumoortumik isumaqatigiissuteqareernertik oqaatigaa.
Qalluisinnaanermullu akuersissutip pissarsiarereernerani maanna aningaasaliinissamut inaarutaasumik isumaqatigiissutissat inissinniarsinnaanngorpaat. Tamannalu aatsitassarsiorfissuarmik sanaartornerup aallartinnissaanut alloriarnerussaaq tulleq pingaarutilik.
Qalluinissamut matusinissamullu pilersaarut
Suut tamarmik pilersaarutit naapertorlugit ingerlassappata, Ironbarkip sanaartorneq 2018-imi aallartissavaa.
- Qalluinissamut akuersissut suliniummut pingaarnertut sinaakkutaavoq, taassumalu suliniutip nunatsinnut kalaallinullu kinguaariinnut tullernut iluaqutaalluni ingerlanneqarnissaa qulakkeerinneqataaffigissavaa, Múte Bourup Egede (IA) oqarpoq.
Ukiullu tulliup ingerlanerani suliffeqarfiup qalluinissamut matusinissamullu pilersaarut, Naalakkersuisunit akuerineqartussaq suliarissavaa.