Monday, March 20, 2017 - 16:02

Inusuttut tarnimikkut anniaatillik amerlapput

Inuusuttunut tarnimikkut anniaatilinnut suna katsorsaariaaseq pitsaanerua? Assit toqqorsivimmit
Assi.: Leiff Josefsen
Inuusuttunut nutaanik neqerooruteqartariaqartoq, Malene Lynge (IA) isumaqarpoq. Inuusuttummi tarnimikkut anniaatillik amerliartuinnarput.

Inuusuttut piorsaavimmi tapersersorneqarnissaq, qanilaarnermik aammalu sammisassanik pisariaqartitaat tamatigut tunniunneqarneq ajorput. Inuusuttut neqeroorummik atuisuusut ikileriarsimasut, kommunalbestyrelsemi ilaasortap Malene Lyngep paasisimavaa, inuusuttulli tarnimikkut anniaatillik amerliartuinnarlutik.

Atuaruk: Ujartueqatigiit atornerluisut aamma angerlarsimaffeqanngitsut nanisassavaat

- Isumaginninnermut, Suliffeqarnermut Inuussutissarsiornermullu Ataatsimiititami paasitinneqarpugut, assersuutigiinnarlugu inuusuttut eqqarsartaatsimikkut innarluutillit amerliartortut. Aammami kommunip avataani angerlarsimaffinnit innuttaasut amerliartortut angerlartittalernikuuvagut. Peqatigitillugu inuusuttortaqarpugut, suliffeqanngitsunik imaluunniit ilinniagaqarsimanngitsunik, inuunerminni ingerlariaqqinnissaminnut ikorfartortariaqartunik tapersersorneqartariaqartunillu. Inuusuttunut taakkununnga assigiinngitsunik tunuliaqutalinnut, assigiinngitsorujussuarnik pisariaqartitaqartunut neqeroorutit assigiinngitsut pigisariaqarpavut, kommunalbestyrelsemut siunnersuuteqartoq, Malene Lynge, oqarpoq.

Ikileriarsimasut

Nuummi Piorsaavimmi pulaartarnermini paasisimavaa inuusuttut neqeroorummik atuisuusut ikileriarsimasut. Tamannalu pissutigalugu sullitat nalilersuivigineqarnissaannut periarfissat pillugit kommunalbestyrelsimut oqaluuserisassanngortippaa. 

- Taamaammat siunnersuutigerusuppara Piorsaavimmi illoqarfinni tamani sullitat siulliullugit nalilersuiffigineqassasut, neqeroorut sullitatsinnut naleqqunnersoq naleqqutinnginnersorluunniit uppernarsiniarlugu. Neqeroorut sullitatsinnut naleqqukkunnaarsimasoq paasinarsippat, taava Kommunalbestyrelsip eqqartortariaqarpaa suut suliniutigineqartariaqarnersut, inuusuttortatsinnut eqqortunik neqerooruteqarsinnaaniassagatta, Malene Lynge oqarpoq.

Ingerlatsiveqarfiup innersuutigaa ingerlatsivimmit suliaq suliareqqinneqassasoq apriilimi inaarutaasumik saqqummiunneqarnissaanut aalajangiiffigineqarnissaanullu. 

Seneste nyheder / Nutaarsiassat kingulliit