oqartussaaqataaneq
Inissiani uummasuuteqarsinnaaneq taasissutigineqartalerli
Kommunip inissiaataani attartortut namminneq aalajangiisinnaanissaat siunnersuutigineqarpoq
Kommuneqarfik Sermersuup inissiaataani attartortut uummasuuteqarsinnaaneq akuerinerlugu akuerinnginnerluguluunniit siunissami toqqaasalissapput. Kommuneqarfik Sermersuumi Isumaginninnermut, Suliffeqarnermut Inuussutissarsiornermullu ataatsimiititaliami siulittaasuunikoq Malene Lynge (IA) siunnersuuteqartoq taama isumaqarpoq.
Aningaasaqarnermut ataatsimiititaq ukioq manna ataatsimiinnerminni kingullermi tamanna eqqartorpaat.
Atuaruk: Qimmit 70-it qimmit nappaataannik toqupput
- Attartortut ulluinnarminni sunniuteqarsinnaanerulernissaat piffissanngorpoq, Malene Lynge siunnersuutimini ataatsimiititaliani eqqartorneqartareertumi oqaaseqarpoq.
Amerlasuut taasissapput
Qimmeqarsinnaaneq qitsuuteqarsinnaanerlu akuerissanerlugu ineqartut namminneq aalajangissagaat Malene Lynge politikkerinut kaammattuuteqarpoq.
- Attartornermut peqqussutip attartortut immikoortortaqarfinnilu siulersuisut sunniuteqarnissaanut periarfissiivoq maannakkut ingerlariaatsimut sanilliullugu, Malene Lynge erseqqissaavoq.
Uummasuuteqarsinnaanermut siunnersuutigineqartoq akuerineqassappat inissiat peqatigiiffiini siulersuisut ineqartullu aalajangiiniarnermut peqataatinneqartassapput. Ataatsimiinnerni ineqartut peqataanngitsoorpata taaseqataanatillu, taasisut ikippallaarpata, uumasuuteqarsinnaaneq akuerineqassangitsoq siunnersuummi erseqqissaassutigineqarpoq.
5000 koruuninik akeqarpoq
Massakkut ilaqutariinnut inissiani, aamma inissiat marloqiusani attartortunut qimmiuteqarnissamut aamma qitsuuteqarnissamut qinnuteqarnissaq kisimi ajornartinneqanngilaq. Tamanna ima isumaqarpoq, najugaqarfinni attartortut qularnaveeqqummik 5.000 koruunimik akiliinikkut qimmeqarnissamut aamma qitsuuteqarnissamut akuersissummik pisinnaasut.
Qimmiaqqat qiluttut qitsuillu uummasuuteqaqqusaanngitsuni pigineqartut naammagittaalliuutigineqartarneri annertuvoq. Naammagittaalliuutit tallimaraarterutai Iserit-mut tunniunneqartartut uumasunut, ingammik uummasuuteqaqqusaanngitsuni, naammagiuttaalliuutaapput.
Taasineq qimmeqarsinnaanermut qitsuuteqarsinnaanermullu taamaallaat taasinerussaaq. Akuersissutigineqassappallu Namminersorlutik oqartussat uummasuuteqarsinnaanermut malittarisassai atuuttut malinneqassallutik.
Saaniluit hamsterillu ajunngillat
Saaniluuteqarsinnaaneq, timmiaaqqat, hamsterillu uumasuutigineqarsinnaapput akuersissummik qinnuteqartoqanngikkaluarluni.