qimmmit nappaataat
Qimmit 70-it qimmit nappaataannik toqupput
Kalaallit Nunaanni Uumasunut Nerisassanullu Oqartussaasut erseqqissarpaat qimmit akiuussutissamik kapineqarnissaat qimmiutillit akisussaaffigigaat
Qeqertami qimmit, qimmit nappaataannik toqusut akunnaallisillugu 70-iugallarput. Qimmillu ilarpassui ukiunik marlunnik pisoqaassuseqarput. Taamatut paasissutissiivoq Kalaallit Nunaanni Uumasunut Nerisassanullu Oqartussaasut.
Tallimanngormat Namminersorlutik Oqartussat nalunaarutigaat tallimanngormat arfininngormallu akiuussutissanik Saqqamut Qeqertamullu nassiussisoqartoq, nunaqarfinni taakkunani marlunni qimmit nappaataat atugaammat.
Atuaruk: Akiuussutissanik Saqqamut Qeqertamullu nassiussisoqarpoq
Piginnittoq akisussaasuuvoq
Tamatuma saniatigut Kalaallit Nunaanni Uumasunut Nerisassanullu Oqartussaasut erseqqissarpaat qimmiutillip qimmimi akiuussutissamik kapineqarnissaat akisussaaffigigaa. Ilisimaneqarpoq qimmit nappaataat Kalaallit Nunaanni atugaasoq, qimmillu tamanna toqqutigisaraat.
– Taamaattumik ukiorpassuarni inassutigisarsimavarput qimmiutillit isumagisassagaat qimmiaqqat nappaammut akiuussutissamik kapitinneqartarnissaat allanullu akulerutsinnaveersaartarnissaat. Tamatuma saniatigut erseqqissarneqassaaq nappaat atugaalereersimappat akiuussutissamik katsorsarneqarsinnaanngimmat, Nanoq. gl naapertorlugu Óluva Niclasen, Kalaallit Nunaanni Uumasunut Nerisassanullu Oqartussani immikkoortoqarfimmi pisortaq oqarpoq.
Parvovirus
Qimmit nappaataat, Qeqertami qimminit atugaasoq, pinngitsoortinniarlugu pingaaruteqarpoq qimmit tamarmik sapaatit akunnerinik 12 aamma 16 akornanni pisoqaassuseqaleraangata, qimmit nappaataannut aamma parvovirusimut, akiuussutissamik kapineqartarnissaat.
Sumiiffinni immikkut ulorianartorsiorfiusuni oqartussaasut ilanngullugu inassutigaat qimmiaqqat qaammat ataaseq qaangiuttoq kapeqqinneqartassasut.
Suliniutit arlallit
Tamatuma saniatigut Qaasuitsup Kommunia aamma Aalisarnermut, Piniarnermut Nunalerinermullu Naalakkersuisoqarfik aalajangersimapput nappaat pakkersimaarniarlugu: Nappaatip siaruaannera unitsinneqassaaq. Qimminik qimmiaqqanillu angalaaginnartoqassanngilaq. Namminerlu qimmiutit nakkutigineqassapput, qimmeqatigiinnut allanut akulerunnaveersaartillugit. Aamma sianigalugu qimmit allat quuannik anaannillu attuinnginnissaat.
Qimmit napparsimasut immikkoortinneqassapput imaluunniit piaarnerpaamik toqunneqassallutik. Qimmit toqunneqartut piaarnerpaamik suujunnaarsinneqassapput.
Oqartussaasut Qaasuitsup Kommunia suleqatigalugu qimmit peqqissut kapoorneqarnissaannik suliniuteqalerput.