Friday, November 3, 2017 - 18:09

Imigassamut inatsisissamut akerliussutimik takutitsinerit naalakkersuisoq sunninngilaat

Assi.: Leiff Josefsen
Ullumikkut tallimanngornermi, Pisiffik aamma Brugseni imigassat aalakoornartortallit pisiassanut allanut assersorpaat inatsisissamut siunnersuut akerlilersorlugu. Inuttut qilanaaraara assiaqusersuinissamut siunnersuut piviusunngortinnissaanut misigissallugu, Peqqinnissamut naalakkersuisoq Agathe Fontain oqarpoq.

- Pisiffik Brugsenilu imigassamut aalakoornartortalimmut inatsimmut isertitassaminnut ernumassuteqartut paasisinnaavara, taamaattumillu Inatsisartunut sapinngisartik naapertorlugu inatsimmut atuutilersitsinissamut itigartitsissutigineqarnissaanut sunniiniarlutik.

Peqqinnissamut naalakkersuisoq Agathe Fontain (IA) oqarpoq, Pisiffiup Brugsenillu akerliullutik assersuereernerisa kingorna.

Najaoqqutassaqanngilaq
Pisiffiup Brugsenillu tikkuarpaat inatsisissap akinik qaffaanermik kinguneqartussap sulisut ilinniartullu 18-liineqanngitsut eqqprtussaagai, tamanna pisiniarfeqarfinniit tunngavilersuut Agathe Fontainip paasisinnaanngilaa.

- Isumaga malillugu tunngavilersuut allannguutissatut siunnersuut malillugu equngasorujussuusoq. Agathe Fontain oqarpoq nangillunilu.

- Maannakkununa uagut politikeriusugut aalajangiusimasussaasugut isummersortussaallutalu. Suliassaraarput inuiaqatigiit pitsaasumik inuunissaannut sinaakkusersuinissaq. Taamaattumik imigassamut aalakoornartortalimmut inatsiserput meeqqatsinnut inuusuttortatsinnut, siunissatsinnut, isumaginnittuussaassooq. Uani suliffeqarfinnut imigassamik aalakoornartortalimmik aningaasarsiortunut soqutiginninneq pingaannginnerutillugu.

Atuaruk: Pisiffik Brugsenilu imigassamut inatsisissaq akerliuffigaat

Meerartagut illersortigit
Agathe Fontain malillugu imigassartorniaraanni 18-leereersimasariaqarpoq, taamatullu imigassanik tuniniaaniaraanni 18-leereersimasariaqarluni.

- 16-nik ukioqarluni nalunngisaq imaluunniit malunnartumik aalakoortoq itigartinnissaanut ajornakusoorsinnaavoq. Akisussaaffik tamanna inuusuttortatsinnut tunniutissanngilarput. Tamatta pisussaaffeqarpugut – aamma pisiniarfiit – inuusuttut 18-it ataallugit ukiullit illersussallugit.  Agathe Fontain tikkuaavoq.

Imigassanillu pisiniarfinni assersuisoqalernissaa qilanaaraa
- Brugseni ullormiit ullormut assiaqusersuinerata takutippaa imigassamik aalakoornartortalimmik assiaqusersuineq pisiniarfinnut akisusariaqannngitsoq ajornakusoortariaqanngitsorlu. Neriuutigaara Pisiffik-mi Brugenimilu ullumikkut pisiniartorpassuit imigassamik aalakoornartortalimmik assiaqusersuineq pitsaasutut misigisimassagaat, Agathe Fontain oqarpoq.

Seneste nyheder / Nutaarsiassat kingulliit