Ilulissat
Ilulissat kangiata illorsuassaanut millionerpassuit tunniunneqartut
Ilulissat kangiata illorsuassaanik sananiarluni pilersaarutit piviusunngortinneqarnissaat qanillivoq
Realdania, Danmarkimi sanaartornerup iluani suliniutinut kikkunnut tamanut iluaqutaasussanut tapiissuteqartartoq, Ilulissat kangiata illorsuassaanut sanaartornissamut aningaasaliissuteqarpoq.
Qaasuitsup Kommuniani kommunalbestyrelsi siusinnerusukkut aalajangereernikuuvoq suliniut tapersersorniarlugu, kisianni Ilulissat kangiata illorsuassaanut sanaartornissamut aningaasaliissutissat aningaasaateqarfiit tapiissuteqarneratigut aaneqartussatut siunniunneqarnikuullutik.
Taamalu iliuuseqarusuppoq Realdania 80 million koruuninik aningaasaliissuteqarnermigit. Taama knr.gl allappoq.
Atuaruk: Ilulissat kangerluata illorsuassaa qanilliallappoq
Kommunalbestyrelsi februaari 2014-imi 1,1 million koruuninik kangiata illorsuassaata pilersaarusiorneqarneranut aningaasaliissuteqarniarluni aalajangernikuuvoq. Soorlu aamma 2015-imut, 2016-imut kiisalu 2017-imut aningaasaliissutissanik immikkoortitsereernikuulluni.
- Suliassaq tamarmi 112 millioner koruuninik akeqartussatut pilersaarutaavoq. Qaasuitsup Kommuniata 23 millioner koruunit aningaasaliissutiginiarpai aningaasartuutissallu sinneri aningaasaateqarfinnit matussuserneqarnissaat naatsorsuutigineqarpoq, Qaasuitsup Kommuniani borgmesteri Ole Dorph Sermitsiaq.AG-mut taamani taama oqarpoq.
Ilulissat kangerluat pillugu illorsualiornissat ukiut arlallit pilersaarusiorneqarpoq.
Realdaniap aningaasaateqarfiutaata allap, tassalu Realdania Bygip aamma Ilulissat kujataani nunaqarfimmi Ilimanami illorsuit oqaluttuarisaanikkut pingaaruteqartut marluk nutarsarneqarneri aningaasaliiffiginikuuai.
Atuaruk: Ilulissat kangerluata illorsuassaa qanilliallappoq