suliffissaqartitsineq
Ilulissani ingerlalluartut
Royal Greenlandip tunisassiorfiisa ilaanni sulisoqarniarneq illoqarfiit ilaanni ajornartorsiutaagaluartoq Ilulissani pissutsit allaanerupput. Ilulissanimi sulisunik atorfissaqartitaminniit amerlanerusunik sulilersitsisarput
Qasigiannguani tunisassiorfimmi sulisussanik amigaateqartoqarpoq, Royal Greenlandilli Ilulissani tunisassiorfiani sulisussanik amigaateqarnermik ajornartorsiut aaqqiivigineqarsimalluni sulisussanik amerlanernik sulilersitsinikkut.
Royal Greenland nittartakkamini taama allappoq.
- Tunisassiorfipput naammaginartumik ingerlassappat sulisut 72-it atorfissaqartittarpavut. Sulisulli 90-it tunisassiornermik ingerlataqarput. Taamaammat napparsimasoqartillugu tunisassiornerput sunnerneqarpallaarneq ajorpoq, Ilulissani tunisaassiorfimmi ingerlatsisoq Jensigne Schmidt oqarpoq.
Atuaruk: Aalisakkanik suliffissuaq sulisussaaleqisoq
Qasigiannguanut nassiussisartoq
Ilulissani Royal Greenlandip tunisassiorfia raajanik tunisassiorfiuvoq, qaleralinnillu Qasigiannguani tunisassiassanik tunitsiviulluni. Qaammatinilu kingullerni tunisassiorfimmi sulisut sulinerat aamma tunisassiorneq ingerlatsisup naammagisimaarpaa.
- Raajat ullormut 60-80 tonsit tunisassiarisarpavut aalisakkallu 5-6 tonsit missaat ullormut tunitsivimmut tunineqartarlutik. Taamaammat piffissaq kingulleq ingerlalluartutut nalilertariaqarpara, Jensigne Schmidt Royal Greenlandimi paasissutissiisarnermik suliaqartumut oqarpoq.