Qasigiannguit
Aalisakkanik suliffissuaq sulisussaaleqisoq
Royal Greenlandip Qasigiannguani tunisassiorfiani sulisussaaleqisoqarnerata kingunerisaanik qalerallit 2,5 tonsit igiinnarneqartariaqarsimapput
Royal Greenlandip Qasigiannguani tunisassiorfiani aasaanerani sulisussaaleqisoqarnerata kingunerisaanik qalerallit 2,5 tonsit igiinnarneqartariaqarsimasut, suliffissuup pisortaa Royal Greenlandip nittartagaanut oqaluttuarpoq.
- Naak tunisassiorfik suleqatigiiaanut marlunnut avitanik 120-nik sulisoqaraluartoq sulisut 60-it amigaatigineqarput. Tamatuma saniatigut sulisut 30 procentii ullut ilaanni sulinngitsoortarput, Royal Greenlandip Qasigiannguani suliffissuani pisortaq, Frank Hagen, oqarpoq.
Pissutsit ajorluinnartut
Suliffissuup pisortaa oqaluttuarpoq, pissutsit eqqaaneqartut atuutsillugit tunisassiornissamut pilersaarutit malinneqarsinnaaneq ajortut, tamannalu tunisassiakippallaarnermik tamatumanilu isertitakippallaarnermik kinguneqartartoq.
- Pissutsit eqqaaneqartut ajorluinnarput, tamatumani tunisassiorfik ataavartumik isertitaqarsinnaanngimmat, suliffissuup pisortaa Frank Hagen oqarpoq.
Taanna oqaluttuarpoq, sulisut suliartunngitsoortarnerat napparsimallutilluunniit suliartunngitsoortarnerat pissutigalugu tunisassiornissamut pilersaarutit ajoraluartumik malinneqarneq ajortut. Erseqqissaallunilu oqarpoq, ajornerpaaq tassaasimasoq aalisagarpassuit igiinnarneqartariaqarsimanerat.
Suleqatiserinninneq
Qasigiannguani suliffissuup pisortaa Royal Greenlandip nittartagaanut oqaluttuarpoq, suliffissuarmut sulisussanik sulisussarsiornissaq anguniarlugu SIP Qasiagiannguit kiisalu Qaasuitsup Kommuniani suliffissarsiuussisarfik suleqatiserisimagini. Suliartortoqarsimanngilarli.