Ilinniarneq
Ilinniartut peqatigiiffiata Nivi Olsen nersualaarpaa
Ilinniartut akornanni ilinniakkamik unitsitsiinnartartut aaqqiiviginiarlugit ilinniarfiit nalilersorneqalermata, Ili Ilip nuannaarutigaa
Ilinniarfinni ingerlaqqiffiusuni ilinniartut amerlasuut akornanni uniinnartarneq unitsinneqassappat, ilinniartut kisimik isiginiarneqassanngillat.
Ilinniartut peqatigiiffiat Ili Ili taama allappoq, ilinniarnermut naalakkersuisoq Nivi Olsen (D), Ilisimatusarfimmi ilinniarfiit nalilersorneqarnissaanik aalajangermat peqatigiiffiup nuannaarutigaa.
Aqutsisunut piumasaqaateqaqqusisut
- Nunatsinni ilinniarfinni qaffasinnerusuni ilinniartut iniinnartartut amerlavallaarujussuarpata, ajornartorsiut tamakkerlugu isigineqartariaqartoq, Ili Ili isumaqarpoq. Tassani Ilisimatusarfimmi aqutsisut, ilinniartitsisut ilinniarfiillu pitsaassusaat sammineqarlutik, ilinniartut peqatigiiffiat tusagassiuutinut nalunaarummi allappoq.
Atuaruk: Ilinniartut unitsitsiinnartarnerat filmimik pinaveersaartinneqassaaq
Peqatigiiffiup erseqqissaatigaa, aqutsisunut piumasaqaateqartoqarnerusariaqartoq, ilinniartut piumasaqaatinut naammassinnissinnaannginnerat sammineqangaatsiareermat.
- Nalilersuisoqarniarnera nuannaarutigaarput, ilinniartut uniinnartarnersuat unitsinnissaanut iluaqutaassasorigatsigu. Ilinniartuinnaat akisussaaffilersornagit kikkut tamarmik akisussaaffilerlugit, tassa aqutsisut, ilinniartitsisut sinaakkutissallu.
Atuaruk: Ilinniagaqarnersiutit pillugit inatsisissamut allannguutissaq