IA-p ataatsimeersuarnera: Inuiaat ingerlalluartut - Nunatta nakuussutai

Partiimut nunani avannarlerni ilaasortat partiimullu siulittaasuusimasut Aqqaluk Lynge Josef Tuusi Motzfeldt ataatsimeersuarnermut peqataasut ilagaat.

Inuit Ataqatigiit Ilulissani siulittaasuat Karo Thomsen ataatsimeersuarneq ammarlugu qullermik ikitsivoq. Qimussertartup ilisarisimaneqarluartup Ono Fleischerip nunani avannarlerni qimussersimanerminit misigisalikkersaarpoq, erinarsoqatigiit Imilik erinarsuutinik atuivoq meeqqallu kalattoorlutik takutitsillutik.

Atuaruk: IA-p ataatsimeersuartitsinera kinguaattoortoq

Partiip siulittasua Sara Olsvig naatsukullamik tikilluaqqusilluni oqaaseqarpoq. Oqallinnermillu Ole Dorph (S) Qaasuitsup kommuniani borgmesterip sulisartullu kattuffianni SIK-mi siulittaasup Jess G. Berthelsenip aallartitsisuupput.

- Pissutsit nutaat ornippagut. Mittarfiit tallilerneqarneri kommunerujussuanngornerlu, Ole Dorph oqarpoq.

Jess G. Berthelsenillu Naalakkersuisut suliffissaaleqisut amerlassusaannik ikilisitsisimanerinik nersualaariarlugit ima oqarpoq:

- Narsami aatsitassanik qaqutigoortunik piaasoqalernissaa aallartittariaqarparput kujataani suliffissaqartitsineq pilersinniarlugu, oqarpoq - nalunngilluaraluarlugu partiit siunnitaasa pingaarnersaat ilagigaat aatsitassanik uranitalinnik piaaqqusinnginneq.

Atuaruk: Naalakkersuisooqatigiilersut uranimut aalajangiinissaq kinguartippaat

Naalakkersuisullu kiffartuussinissamut isumaqatigiissusiaa isornartorsiussallugu aamma tunuarsimaanngilluinnarpoq.

- Namminersorlutik inuussutissarsiortunut angallanneq ingerlanneqalerneranit pissutsit akikinnerulinngilluinnarlutillu ajornannginneruleratillu pitsaanerulinngillat, oqarpoq.

Atuaruk: Siumut IA aamma Partii Naleraq naalakkersuisoqatigiilerput

Ataatsimeersuarnerup ingerlanerani oqallisissat assigiinngillat, soorlu anguniagassat, angallanneq, peqqinneq, ilinniartitaaneq, aatsitassanik piiaaneq inuussutissarsiornerlu.