ataatsimeersuarneq
IA-p ataatsimeersuartitsinera kinguaattoortoq
Nuup mittarfia sermernarneranit quatsersimammat Inuit Ataqatigiit nuna tamakkerlugu ataatsimeersuartitsinerani peqataasussat amerlasuut unnukkut quligiluanut aatsaat Ilulissanut apuupput.
Annonse
Ataatsimeersuarnermut peqataasussat piffissarititaq malinnagu apuummata ataatsimeesuarnissaq arfininngornermut kinguartinneqarpoq. Ullaakkullu qulingiluanut aallartilluni.
Inuit Ataqatigiit siulittaasua Sara Olsvig tallimanngornermi ualikkut sisamanut ataatsimeersuarneq ammassagaa pilersaarutaagaluarpoq. Partiip tunngaviusumik siunnerfia suliarineqartussaagaluarpoq katersortarfimmilu qittatsitsisoqartussaagaluarluni.
Pilersaarutilli allanngortariaqarneranit ataatsimeersuarneq ullumi aqagulu ingerlanneqartussanngorpoq.
Sermitsiaq.AG ataatsimeersuarnermi peqataavoq atuartartutsinnullu malinnaatitsiumaarluta.