qimmit nappaataat
IA-meersoq: uumasut nakorsaaqarnikkut ajornartorsiutit akuerineqarsinnaangillat
Avannaani qimmit nappaataannik ajornartorsiorneq maanna aaqqiivigineqartariaqarpoq, Inatsisartuni ilaasortaq Ane Hansen (IA) taama isumaqarpoq
Avannaani nunaqarfinni marlunni, Saqqami aamma Qeqertami, qimmit akornannit qimmit nappaataannik tunillaassuuttoqarpoq.
Maanna aamma Qaasuitsup Kommunia nunaqarfiit taakku marluk akornanni qimussimik aamma qamuteralannik angallanneq tamaat unitseqqullugu kajumissaaruteqarpoq.
Naalakkersuisut iliuuseqartariaqarput
Ulluni makkunani pisut takutippaat uumasut nakorsaata sillimaniarnikkut qanoq pitsaangilluinnartigisumik inissisimanera, tamanna akerineqarsinnaangilluinnarpoq, Inatsisartuni ilaasortaq Ane Hansen (IA) isumaqarpoq.
- Qimmit nappaataannut akiuussutissanik kapuutissat Naalakkersuit akisussaaffigaat (qimmit nakorsaat kapuutillu), Kommunemiippoq (qimminik nakkutilliisoqarnikkut kapuuisarnerillu) soorunalumi qimmit piginnittui annerpaamik akisussaaffeqarput, taanna tusagassiuutinut nalunaarummi allappoq.
Atuaruk: Qimmit nappaataannut akiuussutissamik amigaateqartut
- Uumasut nakorsaat minnerpaamik nappaalanernut akiuiniapallassiinnaanissaq sillimaffiginiarlugu najoqqutassanik ersarissakkamik oqartussaasut allat peqatigalugit pilersaaruteqartariaqarpoq, akisussaaffiillu qanoq agguarneqarsimanissaat pisuni taamaattuni nalornissutigineqartussaangilaq, IA-mi politikeri erseqqissaavoq.
Nakkutilliineq
Taamaattumik taanna isumaqarpoq, kommunit qimminik nakkutilliisoqarneq illoqarfinni qimmeqarfiusuni tamani peqartariaqarnera qulakkeerneqassasoq, kiisalu qimmit nappaataannut akiuussutissanik kapuuineq ingerlaavartumik ingerlanneqassasoq.
- Uani pisumi qimmiutillit, kommunit naalakkersuisulluunniit akisussaaffimminnik qimarratiginninniarsarissanngillat, akisussaaffimmullu naapertuuttumik tamarmik iliuuseqartariaqarlutik, Ane Hansen allappoq.