IA-meersoq: Royal Greenlandip sulisut aalajaatsuunissaat annertusisarsimanerpaa?

Sermitsiaq.AG-p sapaatip-akunnerani kingullermi allaasereriigaatut, Kinamiut 30-t upernaaru Maniitsumi, Uummannami Qasigiannguanilu tunisassiorfinnut suliartussapput.

Nunami tunisassiorfinni sulisussaaleqinermik ajornartorsiuteqartuarneq pissutigalugu, Royal Greenland nunanit allaneersunit sulisussarsiortariaqarpoq.

Atuaruk: Kinamiut 30-t tunisassiorfinni sulissapput

Apeqqutinik arlalinnik saqqummiussisoq
Inatsisartunut ilaasortaq Mimi Karlsen (IA), suliiffeqarfik sooq Kinamut sulisussarsiortariaqarnersoq Royal Greenlandimut arlalinnik apeqquteqarpoq.

Aalisakkanik tunisassiorfinni sulisut aalajaannerulersinniarlugit qanoq iliortoqarsimanersoq, ilaatigut taassuma apeqqutigaa.

- Suliffeqarfiit pitsaasunik siuarsaalluartunillu sulisoqarumallutik assigiinngitsunik iliorsinnaapput. Pikkorissaanerit, ilinniartitseqqinnerit, atortunik nungullarsaataanngitsunik pilersitsinikkut sulisut ilorrisimaartinneqalersinneqarsinnaapput, Mimi Karlsen allappoq.

- Tamannalu naammattumik Royal Greenlandip isumagisimanerpaa? Sulisut akissarsiaasa qaffannerisigut sulisut aalajaannerusut pissarsiariniarlugit iliuuseqarsimanerpa?, taanna tusagassiuutinut nalunaarummi aperivoq.

Atuaruk: Suliffissuaq sulisunik aalajaatsunik amigaateqartoq

Inuiaqatigiit eqqarsartariaqartut
Sulisut aalajaatsut qanoq pilersissinnaanerlugit, inuiaqatigiit tamarmik eqqarsaqatigiittariaqartut taanna isumaqarpoq.

- Suliffisaatituannguatta ilaat Kiniserinut neqeroorutiginnginnerani iliuuserineqarsinnaasut tamaasa misileqqaartigit. Kikkulluunniit sulisinnaasut sulilernissaat anguniartuaannartigu, periarfissanik pitsanngorsaanikkut, akissarsiatigut pitsanngorsaanikkut, ineqarnermi pitsanngorsaanikkut.

- Inuulli sulisuusup pingaaruteqartutut, iluasaarfigineqartutut akissarsiarissaartutullu misigitinnissaa pingaartittuartigu, Mimi Karlsen oqariartuuteqarpoq.

Atuaruk: Sulisussaaleqineq imatut nungutissavaat