Aalisarneq
IA-meersoq: Kim Kielsen suli aalisarsinnaanermut akuersissuteqarpa?
Naalakkersuisunut ilaasortat qinikkatut sulinermi saniatigut aningaasarsiornersoq, Inatsisartunut ilaasortap Aqqaluaq B. Egedep (IA) allagaqarluni apeqquteqarpoq
- Aalisarnermut akuersissut tunngavigalugu Naalakkersuisut siulittaasuat Kim Kielsen (S) aalisarnermiit aningaasanik isertitaqartarpa?
Inatsisartunut ilaasortaq, Aqqaluaq B. Egede, allagaqarluni Naalakkersuisunut taama apeqquteqarpoq. Kim Kielseni aalisarnermut suli akuersissummik peqarnersoq aamma paaserusuppaa.
Tamatuma saniatigut aamma Kim Kielsenip aalisarnermut piffissaq qanoq annertutigisoq atortarneraa paaserusuppaa.
Isertitat
- Naalakkersuisut siulittaasuat Naalakkersuisunullu ilaasortat namminneq aalajangiusimanikuuaat aalisarnermut akuersissut tigummiinnarniarlunikku. Taamatut aalajangerneq tunngavigalugu massakkut Naalakkersuisut qanoq sulinerat pillugu paasisaqarnissara pisariaqartilerpara, IA-mi politikerip apeqqutini taama tunngavilersorpaa.
Naalakkersuisunt siulittaasuat aamma Naalakkersuisunut ilaasortat aallat aamma saniatigut isertitaqarnersut paaserusuppaat.
Atuaruk: Kielsenip umiarsualiviliornissaq kigaallatsippaa
Saniatigut isertitaqarpa?
- Taamaattoqassappat Naalakkersuisunut ilaasortat aamma siulittaasuat saniatigut inuussutissarsiorsimanersut paaserusunnarpoq, Aqqaluaq B. Egede allappoq.
Naalakkersuisunut ilaasortat aamma aalisariutinik allanilluunniit pigisanik nalilinnik piginneqataallutillu ingerlatseqataanersut apeqqutigaa.