Kangerlussuaq

Kielsenip umiarsualiviliornissaq kigaallatsippaa

Kangerlussuarmi umiarsualivimmut nutaamut aningaasaliissutissat suli inissinneqarsimanngitsut, Naalakkersuisut siulittaasuata naqissuserpaa

Kangerlussuarmi talittarfeqarfik ullumikkut ullutsinnut naleqqutinngilaq

Qeqqata Kommuniani kommunalbestyrelsi, qanittukkut kommuni tusagassiuutitigut nalunaaruteqarnerani neriulluarpallaarpoq, Naalakkersuisut kommunilu Kangerlussuup nutaamik piaartumik umiarsualivittaarnissaanut isumaqatigiissimasut tassani atuarneqarsinnaavoq.

Naalakkersuisullu aamma suliniummut 50 millionit koruuninik 2017-imi aningaasaliissuteqarnissaamut qulakkeeriniarneqarput.

Atuaruk: Kangerlussuaq nutaamik umiarsualivittaassaaq

Tassami Naalakkersuisut siulittaasuata Kim Kielsenip tassunga apeqqummut isummiutaat kingusinnerusukkut 'erseqqissartariaqalerpai'.

Aningaasat pissarsiarineqaqqaassapput
Umiarsualiviup pitsaanerusup takornariaqarnermut ilapittuutaalluarsinnaanera Naalakkersuisut isumaqatigaat. Kisianni aningaasat suli qulakkeerneqanngillat.

Aamma umiarsualivimmut nutaamut suliniummik Naalakkersuisut ineriartortitaqarput, aappaagussamut aningaasanut inatsit pillugu Inatsisartuni polikikkikkut isumaqatiginninniarnerni suliniutip ilanngussinnaanissaa siunertarineqarluni, Kim Kielsen Namminersorlutik Oqartussat nittartagaani naqissusiivoq.

Illuatungeriit aamma ukioq naatinnagu Kangerlussuarmi isumasioqatigiittoqarnissaanik isumaqatigiipput, tassani nunaqarfiup siunissaa oqaluuserineqassalluni.

Kangerlussuaq avaqqullugu
Naalakkersuisoqatigiit Siumumit siuttuuffigineqartut, Nuummi Ilulissanilu mittarfiit 2.200 meterinut tallineqarniassammata aningaasaliisussarsiornissamik siunniussaqarput - ilaasut taamaalillutik Atlantiku qulaallugu Kangerlussuarmut aqqusaaqqaaratik angalasalerniassammata.

Tamatumunngalu tunngatillugu apeqquterujussuaq tassaavoq, nunaqarfiup siunissaa qanoq isikkoqassanersoq.

Atuaruk: 'Kangerlussuarmi qanoq amerlatigisut soraarsinneqassappat?'

Powered by Labrador CMS