Greenland Express Air
Greenland Express Airip timminissat tamaasa aamma taamaatippai
Aallarnissat tamarmik 14. juli ilanngullugu maanna taamaateqqammerput. - Billetsinik pisinermi akiliutigineqartut tuaviornerpaamik utertinneqassapput, timmisartuusseqatigiiffik neriorsuivoq
Greenland Express Airimut aporfippassuit annertuut suli takkussuupput. Siorna Gert Braskimit aamma suleqataanit timmisartuusseqqaartalernermi timmisartuusinerit arlaqanngitsuinnaapput, maannalu timmisartuusseqatigiiffik nalunaaruteqarpoq, timmisartuussinissat tamarmik 14. juli ilanngullugu taamaatinneqartut.
Timmisartuussinissaq siulleq sisamanngornermi julip aappaani pisussaagaluarpoq.
Greenland Express Air Facebookkimi ilaatigut ima allappoq:
‘Assut ajuusaarutigisatsinnik Danmarkip Kalaallit Nunaatalu akornanni timmisartuussinissaraluit tamarmik 15. juli 2015 tungaanut taamaatittariaqalerpagut. Tamanna isumaqarpoq, timmisartornissamik uagutsinni pisinerit naammassisinnaanngilarput.
Billetsinik pisinermi akiliutigineqartut aningaasat aningaasaateqarfinnit imaluunniit bankinit pisinermi atorneqartunit tuaviornerpaamik utertinneqassapput.
Akunnerni makkunani sapaatip akunnerini tulliuttuni timissartuussinissatsinnut aporfigisatsinnut ataavartumik aaqqiissutissanik sulissuteqarpugut. Aporfiit tamakku qaangerneqariarpata, annertunerusumik nassuiaateqarumaarpugut’.
Atuaruk: Tusagassiuuteqarfik: Greenland Expressip suliffeqarfik una suleqatigilerpaa
Atuaruk: Pisortat kukkunerat Greenland Expressimut kinguartoortitsisivoq
Aporfippassuit
Greenland Express Airip aallartissarneqarnera assut ajornakusoorpoq, piffissami sivisuumi assigiinngitsorpassuarnik aporfeqarluni, soorlu aningaasaqarneq, sulisoqarneq, suleqateqarneq aammalu akuersissuterpassuit pisortallu kukkussuteqarnerisigut.
Greenland Express Airip Fokker 100 timmisartorisimasaa hollandermiut Denim Air ACMI-minngaanneersut, Aalborgip mittarfianinngaanniit 17. juni 2014 ilaasoqarluni siullermeerlutik Danmarkimit, Island aqqusaarlugu Kalaallit Nunaannut timmivoq.
Timminerit arlaqanngitsut 2014-imi kingorna timisartuusseqatigiiffik ‘unikkallarpoq’ niuernermut periarfissat misissorniarlugit. Ukioq manna Greenland Express Air suli timmisartuussinngilaq - siusinnerpaamillu 15. juli timmisartuussisinnaassaaq.
Greenland Express Airip pisortaanera, Gert Brask, piffissami sivisuumik Sermitsiaq.AG-mit arpersorneqarnissanik kissaatigisimanngilaa.
Greenland Express Air pillugu allaaserisat uani atuakkit