Greenland Express Airip Aalborgi mittarfigiunnaassavaa

Greenland Express Air, ukiarmi nalunaaruteqartoq ‘nutaamik aallarteqqinniarluni’ ilaatigut nutaanik aningaasaliisoqalernikkut timmisartoqalernikkullu, maanna aalajangersimavoq Billundimi mittarfik pingaarnertut mittarfiginiarlugu, timmisartuutileqatigiit Nunatsinnut timmisartuussisarnitik maajip aqqarngani aallarteqqippatigit.

Taama chech-inn.dk allappoq.

Taamaalilluni Greenland Express Air Nunatsinnut Københavnimiit aamma Billundimiit Kangerlussuarmut Narsarsuarmullu toqqaannartumik timmisartuussisalissaaq, Islandimut aqqusaaqqaanngikkaluarluni.

Atuaruk: Greenland Express Airip angallassisalernissamik takorluukkani saqqummiuppai

- Billundip Mittarfia toqqarparput ilaasoqarnerusinnaaneq eqqarsaatigalugu. Kisianni aamma siunertaavoq timmisartuussisarnitta Aalborgimut aamma kingusinnerusukkut ilaneqarsinnaanerat, Greenland Express Airimi pisortaaneq check-in.dk-imut taama nassuiaavoq.

Greenland Express Airip timmisartoq Airbus A320 ilaasunut 168-inut inissaqartoq attartorsimavaa. Timmisartuutileqatigiit siorna timmisartumik Fokker 100-mik attartugarpoq 100-nik ilaasoqarsinnaasumik.

Greenland Express Airimit maanna oqaatigineqarusunngikkallarpoq timmisartuutileqatigiinniit sorlernit Airbus A320 attartorniarneqarnersoq.

Greenland Express Air pillugu allaaserisat allat uani atuakkit