Greenland Express Air
Greenland Express Airip angallassisalernissamik takorluukkani saqqummiuppai
Pilersaarutit malillugit sulineq ingerlassappat Kalaallit Nunaata iluani 2015-mi angallassisalernissaq eqqarsaatigineqarpoq
Aasiaat, Ilulissat, Sisimiut, Kangerlussuaq aamma Nuuk.
Greenland Express Airip illoqarfiit taakku akornanni angallassisalernissani neriuutigaa aappaagumit aallartittumik.
- Illoqarfinni taaneqartuni angallassisalersinnaanissarput neriuutigaarput, Greenland Express Air Facebookimi quppernermini allappoq. Kangerlussuarmit Aalborgimut toqqaannartumik angallassisoqartalernissaa aamma siunnerfigineqarpoq.
Greenland Express Air novembarip naanerani angallasseqqittalernissaa chech-inn.dk-mit naatsorsuutigineqarpoq.
- Inniminniinermut atortut nutaat misilittarpagut, sapaatit akunneri marluk missaat qaangiuppata suliarput naammassissasoq naatsorsuutigaarput. Angallassisalernissarput naatsorsuutigisinnaavarput novembarip naanerani imaluunniit decembarip aallartinnerani, timmisartuutileqatigiiffimmi pisortaaneq Gert Brask chech-inn.dk-mut oqarpoq.
Tamanna iluatsissanngippat timmisartuutileqatigiiffik aasaanerani angallassinissanut piareersalissaaq. Aasaanerani angallassinerit marsimit aallartinneqartarput.
Timmisartuutileqatigiiffik Islandimeersuusutut allassimavoq, Danmarkimili aktieselskabinngornissani sulissutigaa. Rejsegarantifondenimi aamma ilaasortanngornissaq siunnerfigineqarpoq, chech-inn allappoq.
Denim Airimi?
Greenland Express Air septembarip 18-ani kingullermik angallassivoq. Timmisartuutileqatigiiffik angallasserngaarpoq juunip 17-ani.
Timmisartuutini aamma attartortittarpai.
Gert Braskip juulimi Denim Airimut qisuariaateqarpoq timmisartunik sulisunik amigaateqartarnerarluni. Timmisartuutileqatigiiffik aningaasaliisussamik allamik ujarlertoq oqaatigineqarpoq, siunissamilu nammineq timmisartoqalernissani siunnerfigalugu.
- Denim Air suli suleqatigineqassanersoq naluarput. Suliffeqarfimmik allamik aamma isumaqatiginninniarpugut, Gert Brask chech-inn.dk-mut oqarpoq.