Greenland Express Air
Gert Brask: Angallasserngaarnissamut piareerpugut
Greenland Express Air siullermeerluni Aalborgimit Kalaallit Nunaannut juunip 17-ani angallassissaaq
Greenland Express Airip timmisartua Fokker 100 siullermeerluni angallassingajalerpoq.
Timmisartuutileqatigiiffiup pisortaa Gert Brask oqarpoq.
Aalborgip mittarfianit juunip 17-ani aallassaaq. Tassanngaannit Københavnikkooriarluni Islandiliariarluni Aalborgiliassaaq.
Greenland Express Air siullermeerluni juunip aappaani angallasserngaartussaagaluarpoq, juunip 17-anulli kinguartinneqarluni. Tamanna Gert Braskip naqissuserpaa.
Gert Brask, sooruna Facebookikkut maajip 29-ani ilaatigut ima allappit: '- Ukiuni pingasuni Greenland Express Airip aallartisarnera sullisigereerlugu, danskinit kalaalliniillu tusagassiuutinit isornartorsiorneqaqattaareerlunga Greenland Express Airimi aattuumassuteqarusukkunnaarpunga sukkanerpaaq atorlugu. Suliffeqarfimmik soqutiginnittoqarpat Greenland Express Air tunissavara, suliffeqarfillu kalaallisut tarneqartumik, Danmarkimit Nunatsinnut utimullu akikitsumik angallasserusuttunut tunineqassaaq. '?
- Facebookikkut allatara atuarukku akissutaa takussavat. Unali Facebookinnut allataraara, ikinngutinnut nalunngisannut ilaqutannullu allallunga.
'Eqqarsaqqaarnani' allataq
- Suli Greenland Express Airimiikkunnaarusuppit?
- Naamik. Facebookikkut allatara Sermitsiakkut allanneqarpoq. Nuanninngilarmi 'salluliortuusutut' Sermitsiamit oqaatigineqarluni, kisianni nakkarfiginngilara. Maajip 30-ani salluliortuunerartippunga, taamaammallu Facebookinnut 'eqqarsaqqaarnanga' taamatut allallunga, Gert Brask nassuiaavoq.
Gert Braskip Sermitsiaq.AG-mi allaaserineqartoq 'Angallasserngaarnissap kinguartinnera Gert Braskip salluliuutigaa' eqqartorpaa. Tassani Hollandermiut timmisartuutileqatigiiffiata Denim Air ACMI-p pisortaata Ronald Janssenip Gert Braskip angallasserngaarnissamut sooq kinguartitsisoqarnera paasisinnaanagu Sermitsiaq.AG-mut oqaatigimmagu.
Greenland Express Airip angallasserngaarnerani Sermitsiaq.AG peqataatitaqassaaq.
Greenland Express Air pillugu pisullu allat pillugit aviisimi Sermitsiami atuakkit: Aviisi ataani pisiariuk: