immap assingi
Geodatastyrelsip nuunneqarnera ministerip peqqissimissutiginngilaa
Naak immap assingi digitaliusut Kujataani suliarineqarneri unittooqqagaluartut, danskit sila- aamma nukissiornermut ministeriata Lars Christian Lilleholtip (V), Geodatastyelsip Aalborgimut nuukkamiuk peqqissimissuteqanngilaq.
Kujataata kitaani immap assingini 41-nik kingullernik suliaqarneq 2016-imi unittooqqavoq, ukiormannalu aamma taamaaginnassaaq.
2018-ip ingerlanerani immap assinginik suliaqartoqassanersoq suli nalunarpoq.
- Neriuutigaara, kisianni neriorsuutigisinnaanngilara, sila- aamma nukissiorneq pillugu ministeri Lars Christian Lilleholt (V) Folketingip Kalaallit Nunaat pillugu ataatsimiititaliaani ullumi isumasioqatigiinnermi oqarpoq.
Uteqqissagaluaraa
Geodatastyrelsenip Aalborgimut nuutsinneqarnerata kingorna immap assinginik sanaartorneq unippoq. Sulisut 15-iusunit 14-it tassani suliunnaarniarlutik nalunaaruteqaramik.
Taamaakkaluartoq ununneqarnerat isumassarsiatsialaasoq, Lars Christian Lilleholtip (V) ullumi isumasioqatigiinnermi aalajangiusimaannarpaa.
- Geodatastyrelsenip nuunneqarnera peqqissimissutiginngilara, Lars Christian Lilleholt (V) isumasioqatigiinnermi marloriarluni naqissusiivoq, taamaalioqqikkusussiinnaanerarlunilu oqaatigalugu.
Siornatigut isumasioqatigiinnermi immap assingisa kinguaattoornerat utoqqatsissutigaa, sukkanerpaamillu suliarineqarnissaat politikkikkut pingaarnerpaatinneqarnissaat neriorsuutigalugu.
Atuaruk: Immap assinganik suliaqarneq tupannartoq
- Naalanngisaartoq
Taakku immap assingi 73-iusunit 41-t kingulliit qaqugu piariissanersut aamma isumasioqatigiinnermi oqaatigisinnaannginnerarpaa. Immap assingi kingulliit qaqugu suliarineqarnissaannut aatsaat 2018-ip naanerani pilersaarummik saqqummiussisoqassaaq.
Tamanna aamma qanoq pilersaarnermik isumaqatigiissummi attaveqatigiinnermut naalakkersuisoq, Erik Jensen (S) peqatigalugu ukiormanna aggustimi isumaqatigiissutigineqartumi allaqqavoq.
Tamatuma Enhedslistenimeersup Christian Juulip Lars Christian Lilleholt (V) Namminersorlutik Oqartussanut 'imaqanngitsumik neriorsuuteqartutut' pisuutippaa, 'naalanngisaarnerarlugulu'.
Atuaruk: Immap assinginut isumaqatigiissut nutaaq - piffissaligaanngitsorli
Ukiuni marlunni ilinniartinneqassasut
Sulisup immap assinginik tamakkuninnga suliaqarsinnaalernissaa ukiut marluk missaannik sivisussusilimmik ilinniarteqqaarneqarnissaannik piumasaqaateqartoqarnera ajornartorsiutaavoq. Naak maanna Geodatastyrelsenimi atorfiit tamarmik inuttaqaraluartut, sulisut tamakkiisumik sulilernissaannut suli piffissaq ingerlaqqaartussaavoq. Atorfiit amerlanersaat nunanit allaneersunit inuttaqarput.
Lars Christian Lilleholtip (V) katillugu sulisut 100 nuunneqarnerat attatiinnarnera isumassarsiatsialaanerarmagu, tamanna taassuma isaanik Jyllandip avannaani siuariarnermik ineriartornermillu pilersitsineranik pissuteqarpoq.