GE: Ilinniartitsisussaaleqineq Dorisip kukkusumik aaqqiiviginiarpaa
Doris J. Jensenip ilinniarfissuarmut ilinnialerusuttunut piumasaqaatit appartinnissaanut qineqqusaaruteqarnera erseqqarinnerusumik nassuiaateqarfigisariaqaraa sulisitsisuni pisortap Brian Buus Pedersenip piumasaraa.
- Ilinniarfissuarmi ilinnialerusuttunut piumasaqaatit apparnerisigut ingerlariaqqinnavianngilagut. Taamaaliornikkut inuusuttut amerlavallaat ilinniakkap naammassinissaanut piumasaqaatinik naammassinnissinnaanatik ilinnialersinnaammata. Sulisitsisunut tamanna isumaqatiginngilarput.
Sulisitsisut pisortaanera Brian Buus Pedersen, ilinniartitaanermut naalakkersuisoq Doris J. Jensenip ilinniartitsisunngorniarnissamut piumasaqaatinik oqilisaassiniarluni qineqqusaaruteqarnera pillugu, Sermitsiaq.AG-mut taama oqarpoq.
Oqilisaassineq ajornartorsiummut aaqqiissutaanngitsoq
Ukiut qulit qaangiuppata ilinniartitsut 300-t amigaatigineqalertussaaneri pissutigalugu ilinniartitsisunngorniarnissamut piumasaqaatit oqilisaaffigineqartariaqartut Doris J. Jensenip sapaatip akunnerata siuliani Aasianni qineqqusaartunik ataatsimiisitsinermi oqaatigaa.
- Taamaakkaluartoq siunnersuutip ajornartorsiut iluarsinavianngilaa. Piumasaqaatit oqilisinnerisigut ilinniartitsisut amerlanerulernissaannik eqqarsarneq naapertuutinngilaq. Inuusuttut qaffasinnerusumik ilinniagaqarnissamut piumasaqaatinut naammassinnissinnaanngornissaat pitsaanerusumik ingerlanneqartariaqarpoq, Brian Buus Pedersen erseqqissaavoq.
Nassuiartarneqartariaqarpoq
Doris J. Jensen qineqqusaarutini pillugu erseqqarinnerusumik nassuiaateqartariaqartoq Brian Buus Pedersen isumaqarpoq. Piumasaqaatinik appaanikkut ilinniartitsisunngorniat amerlasuut ilinniakkaminnik naammassinnissinnaanavianngitsut taanna isumaqarpoq.
- Piumasaqaatinik aappaanikkut karakterigissaarani akuerisaanerup ilinniakkamik naammassinnissinnaanermik isumaqalersitsisoqarsinnaavoq. Taamaaliortoqarsinnaanngilarli ilinniarnerummi piareernissaanut piumasaqaatit nikisinneqarunnanngimmata. Piumasaqaatikinnerulernikkut ilinniartitsisussaaleqinerup aaqqiivigineqarsinnaaneranik taakkartuineq Doris J. Jensenip erseqqarinnerusumik nassuiaateqarfigisariaqarpaa, oqarpoq qineqqusaarullu aaqqipallanniaanermik kukkunerusumillu nalilerlugu.
- Piumasaqaatit qaffasissuunissaat pisariaqarpoq. Ilinniartitsisunngorniarneq pitsaasuussaaq ilinnialerumallutillu akuerisaasartut pisinnaasaat ilinniakkamut naapertuuttariaqarput, Brian Buus Pedersen oqarpoq.