IMAK: Piumasaqaatit sakkukillineqarpata atuartitsinerup pitsaassusaanut sunniuteqassapput
Ilinniartitsisunngorniarfimmi ilinnialernissamut piumasaqaatit Doris J. Jensenip sooq sakkukilliniarnerai, ilinniartitsisut kattuffianni siulittaasup Birthe Møller Therkildsenip paasisinnaanngilaa.
Ilinniarfissuarmi ilinnialernissamut piumasaqaatit ilinniartitaanermut naalakkersuisup Doris J. Jensenip (S) qineqqusaarutigisaatut sakkukillineqassappata, ilinniarnerup aamma ingammik meeqqat atuarfiata pitsaassusaanut kinguneqartitsissapput.
Ilinniartitsisut kattuffianni siulittaasoq Birthe Møller Therkildsen Sermitsiaq.AG-mut taama oqarpoq, taassumalu Doris J. Jensenip qineqqusaarutaa paasiuminaatsippaa.
Pitsaassutsimik ukkatarinninneq
- Taarsiullugu pitsaassutsip qanoq qaffanneqarsinnaanera ukkatarineqartariaqaraluarpoq. Meerarpassuit piginnaasamikkut nukilaallutik meeqqat atuarfiannit anisarput. Piumasaqaatit sakkukillineqarnerisigut suna anguniarneqarnersoq paasiuminaatsippara. Meeqqat atuarfianni pitsaassutsip sakkukillineqarnissaanut maanna sulisoqarnialerpa?, IMAK-imi siulittaasoq aperivoq.
Ukiut qulit qaangiuppata ilinniartitsisut 300-t amigaataasussat, sapaatip-akunnerata siuliani Aasianni qinersisartunik ataatsimiititsisoqarnerani Doris J. Jensenip oqaatigaa, tassanilu Ilinniarfissuarmi ilinnialernissamut piumasaqaatit sakkukillineqartariaqarnersut nalilissallugu Siumut piareersimanerarpaa.
- Inuusuttut amerlanerusut ilinniaqqitsinniaraanni piumasaqaatit sakkukilliinnarneqarsinnaanngillat. Qaffasissumik ilinniarnermut pitsaassuseqalersitsiniaraanni saniatigullu piumasaqaatinik sakkukilliinissamik sulissuteqarniaraanni, taava eqqunngitsumik takutitsineruvoq. Ilinniartitsisut piorsaqqillugit sakkussanik tuniorarlugit pitsaanerussaaq, taamaalilluni pitsaassutsimik eqquisoqassanngilaq, Birthe Møller Therkildsen oqarpoq.
Atuaruk: Ilinniarfissuaq angusinngitsoorpoq
Ilinniartitsisut ataqqineqarnerat
- Ukiut qulit qaangiuppata ilinniartitsisut 300-t nunap amigaatigiligassaasa ilinniartinneqarnissaanut suna siunnersuutigaajuk?
- Ilinniartitsisunut ataqqinninneq siornatigut takuneqareersutut pilerseqqinneqartariaqarpoq. Ilinniartitsisut ullumikkut ataqqineqarnerat naammanngilaq, ilinniartitsisut amerlisarniarlugit tamanna pisariaqarpoq. Ataqqinninnerup uterteqqinneqarnissaa immaqa ukiuni arlalinnik sivisussuseqarsinnaavoq, kisianni tamanna pisariaqarpoq, taanna akivoq.
Taamaattumik Naalakkersuisut aamma ilinniartitsisut akornanni oqaloqatigiinnissamik pisariaqartitsisoqarpoq.
- Ilinniartitaanermut aaqqissuusseqqinneq pitsaalluinnarpoq, tamannalu ingerlaqqissasoq neriuutigaara. Kisianni suli unammilligassaqarpoq. Isorliunerusut ilinniarsimasunik amerlanerusunik qanoq ilinniartitsisoqalersinnaanerinut iliuuseqartariaqarput. Ilinniartitsisut isorliunerusuni sulerusuttut malugisinnaavara, kisianni assersuutigalugu isorliunerusuni sulinissaq pilerinarninngortinniarlugu ilinniartitsisut tapisiaannik allannguinissaq pisariaqarpoq, taanna oqarpoq.