assigiinngisitsineq
GBU: Isiginnaartut ajortussarsiorluni suaartartarneq nallerpaat
Unammiat illoqarfimmi allanneersut assigiinngisitsinermik pissusilersorfigineqartarnerat ajornartorsiutaasoq, GBU siulittaasua, John Thorsen, isumaqarpoq. "Isiginnaartut ajortussarsiorluni suaartartarneq nallerpaat," siulittaasoq oqarpoq.
Kalaallit Nunaanni Arsaattartut Kattuffiata siulittaasua, John Thorsen, isumaqarpoq unammersuarnerit nalaanni unammiartortut illoqarfinni allaneersut assigiinngissitsinermik pissusilersorfigineqartarnerat annertummik ajornartorsiutaasoq.
Atuaruk: Isiginnaartup sungiusaasoq oqqassaarinerarpaa
- Misigisarput unammiartortunit allanut assigiinngisitsinermik pissusilersornertut oqaatigineqarsinnaavoq. Isikkammik arsaannerinnarmiinngilaq, timersuutini allani aamma taama pisoqartarpoq soorlu assammik arsaattuni taama pisoqartarpoq, John Thorsen oqarpoq.
- Isiginnaartut ajortussarsiorpalaartumik suaartartarneq nallerpaat, ingammik najukkami unammisartut unammineqartillugit. Tassani unammisartut, sungiusaasut dommeriusulli suaartarneqalersarlutik.
Immikkoortitsisoqareernerani akuliuttoq
Maniitsumi futsalimik pissartanngorniutivittoqarnerani nuanninngitsumik pisoqareernerata kingorna John Thorsen, oqaaseqarpoq. Tassani B-67-ip sungiusaasua Tekle Ghrebrelul isumaqarami ammip qalipaataa pillugu immikkoortitsilluni suaartartoqarsimasoq.
Taamatulli pisoqarsimassappat John Thorsenip assut ajuusaarnartut isigaa. Taamatut pisoqarnerata nalaani taanna timersortarfimmiissimanngilaq.
Immikkoortitsisoqartoq
GBU-imi ammip qalipaataanik immikkoortitsineq ajornartorsiutaanngitsoq, John Thorsen isumaqarpoq. Ajornartorsiut allamiippoq.
- Piffinni mellemrundertoqarnerani anngunniuttoqarneranilu taama ittunik misigisaqartarpugut, isiginnaartut allaneersunik immikkoortitsinertut taaneqarsinnaasumik pissusilersortarmata, John Thorsen oqarpoq.
GBU immikkoortitisinermik pissusilersortoqartarneranut qanoq akulerutsigisartoq illit isumaqarpit?
- Timersornerup iluani immikkoortitsinermik pissusilersortarnerup akiorniarneqarnissaa pisariaqarpoq tamannami akuersaarneqarsinnaanngilluinnarpoq. Unammisat ataqqineqarnerusariaqarput suminngaanneersuuneri apeqqutaatinnagit. Taama pisoqareernerata kingorna pingaartitanik eqqartuisoqartariaqarpoq.
Tekle Ghebrelul oqaloqatigineqarnera
John Thorsenip oqaluttuaraa GBU-p Tekle Ghebrelul oqaloqatigisiariaqaraa, tassani isiginnaartut oqaluttuarmata taanna isiginnaartunut unammisartunulli kamassaarisutut pissusilersorsimasoq.
- Tamanna Teklemut uatsinnulli GBU-imiittunuinnaq tunngasuuvoq. Taanna eqqartueqatigisussaavarput, John Thorsen oqarpoq.