FN-imut maalaarut
FN-imut maalaaruteqarnermigut Vittusip
Naalakkersuisuusimasoq Vittus Qujaukitsoq, Naalgaaffiit Peqatigiinnut maalaarutaa paatsiveerusimaarnermik kinguneqartoq, Siumumi siulittaasunngornissaanut nukittorsaataanngitsoq, politikkikkut oqaaseqartartoq Axel Jeremiassen isumaqarpoq.
Vittus Qujaukitsoq misigissutsit aallaavigalugit amerlavallaanik aalajagiisarpoq kisermaassivallaartarlunili. Naalagaaffiit Peqatigiinnut maalaarut assersuutissanut ilaaginnarpoq, tamannalu Naalakkersuusimasup Siumumi siulittaasunngorneranut nukittorsaataanngilaq.
Politikkikkut oqaaseqartartoq Axel Jeremiassen, taama isumaqarpoq.
Atuaruk: Siumumi eqqissiviilliorneq: Vittup Kim Kielsen uppisinnissaanut piareersimavoq
Kisermaassiniatut eqqaanartoq
- Ulluni kingullerni siulittaasunngornissaanut periarfissat annikkillisut, isumaqarpunga. Partiimi siulittaasuussagaanni, demokratiimut politikkikkulli ingerlatseriaatsit paasisimasariaqartut. Iliuuseqarniartilluni tunulequttanut paasiniaasarnerit tassunga assersuutigineqarsinnaapput. Ingammik nunanut allanut attuumassutillik pineqartillugit, Axel Jeremiassen oqarpoq, taassuma Naalagaaffiit Peqatiigiinnut maalaarut quiatsannartutut isigaa.
Atuaruk: Lars-Emilip Vittu tapersersorpaa
- Peqateqarani ingerlatsinerit, kisermaassiniartumik periuseq eqqaanarsinnaavoq, soorlu Vittus Qujaukitsoq uani peqatarani ingerlatsisimarpasittoq.
Axel Jeremiasseni ilaanngullugu naqissuserpaa, Pituffimmi saliititsinissamut sammisaq "tukattuusoq".
- Iliuuseqarniarluni isumassarsimanera immini ajunngilaq, kisianni taama suleriaaseqarsimanera ajorluinnarpoq.
Politikkikkut toqqammavik amingaateqartoq
Siulittaasunngorniunnerli piviusorsiorsinnaasoq
Atuaruk: Kimmip Siumumi siulittaasuuginnarnissaa tapersersorneqartoq
- Ukiut arlaqanngitsut matuma siorna siulittaasuuffik akerleriissutigineqarpoq, sulilu maanna tikillugu partiimi siulittaasoq pillugu eqqissimasoqarani. Siumup Sisimiuni immikkoortaqarfiata aqutsisunik naammagisaqannginnerat assersuutigineqarsinnaavoq. Partii politikkikkut toqqammavimmik aaqqissuussinermillu amingaateqarpoq.
Vittus Qujaukitsoq politikkikkut pissaaneqarpallaarnerit avaqqullugit iliuuseqarnermigut tapersersorneqalersinnaanerluni?
- Qularnanngilaq taassuma iliuuserisimasai aallavaangalugit taperserneqarsinnaanera, taakkumi politkkimi ingerlatseriaaseq iluarinagu tassuuna takutissinnaavaat. Taamaattoq, taanna misigissutsini aallaavigalugit iliuuseqarsimasoq isumaqarpunga, tamannali eqqortuliornerunngilaq, Axel Jeremiassen oqarpoq.
Siullermiinngitsoq
Vittus Qujaukitsoq siullermiinngilaq peqateqarani iliuuseqartasimanera.
2016-p naajartornerani danskit aviisianni ullormut saqqummersartumi Politikkenimit apersorneqarami sammineqarsimavoq.
Taamani Vittus Qujaukitsoq oqaaseqarsimavoq, tamannali Kim Kielsnimi akerlilerneqarpoq, Vittus Qujaukitsoq Naalakkersuisut peqatigalugit taasisimanngitsoq tunngavilersuutigalugu.