Facebookikkut ujaasineq siulleq iluatsilluartoq

Kalaallit Nunaanni Politiit ippassaq marlunngornermi Facebookimi namminneq qupperneqalerput, ulloq ataasiunngitsorluunniit nittartakkakkut attaveqatigiittarfinneereerlutik suliamik iluatsitsipput, tassani politiit Facebook atorlugu inunnut ikioqqupput. Politiit tusagassiuutinut nalunaarummi taama allapput.

Atuaruk: Politiit Facebookimi naapikkit

Nuummi saassussineq
Ujaasineq tunngavigalugu aamma innuttaasunik saaffiginnittoqarnerata kingorna Sermersuumi politiit, pinerluuteqarsimasumut ilimagineqartumut attaviginninnerannik kinguneqarpoq, taannalu maanna suliami apersorneqarpoq.

Angut taanna sakkortusaarluni saassussisutut ujarneqarpoq, saassussineq sapaammi oktobarip aappaanni nalunaaqutaq 02.30 missaani unnuakkut Nuummi imerniartarfiit ilaanni pivoq. Saassunneqartoq angut 28-nik ukioqarpoq, taannalu arlalinnik kiinnamigut qungatsimigullu ipittumik ajoquserneqarpoq.

Politiit paasisaat naapertorlugit saassunneqartoq napparsimmavimmit angerlartinneqareerpoq.

Aallartilluartoq
Politiit apuutinnginneranni pinerluuteqartoq ingerlareersimavoq, kingornalu paasiniaaneq nassaarinninnermik kinguneqanngimmat, politiit Facebookikkut takunnittunik paasissutissanillu ujaasiniarlutik aalajangerput.

- Facebookimik atuileqqaarnermut maanna naammagisimaarluarparput, politimesteri Bjørn Tegner Bay oqarpoq.

- Sakkortuumik saassussisoqarneranut atatillugu ujaasinerput siulleq, pasineqartumik nassaarnermut pissutaaqataasoq maanna paasinarsivoq, taanna ilanngullugu oqarpoq.