Politiit Facebookimi naapikkit

Kalaallit Nunaanni Politiit ullumimit Facebookimiilerput.

Facebookimi qupperneq innuttaasut politiit ulluinnarni suliaannik annertuunik annikitsunillu paasitinneqarnerinut atorneqassaaq, taamatullu Kalaallit Nunanni annertuumik pisoqartillugu politiit innuttaasunut toqqaannartumik attaveqaatitut atortassavaat.

Toqqaannartumik attavik
Kalaallit Nunaanni innuttaasut amerlasuut Facebookimik atuisuupput. Kalaallit Nunaannilu Politiit maanna atuilerput, tamannalu minnerunngitsumik politiit innuttaasut sumiiffianiikkusunnerannik pissuteqarpoq.

- Kalaallit Nunaanni innuttaasunut toqqaannartumik attaveqarusukkatta Facebookimiilerniarluta aalajangerpugut. Taannalu ulluinnarni aamma annertuumik pisoqartillugu atorsinnaavarput, politimesteri Bjørn Tegner Bay oqarpoq.

- Suliffeqarfik nutaaliaanerput aamma kiffartuussinissamik ilisimasaqarluarnerput takutikkusupparput, innuttaasullu amerlasuut ullup ingerlanerani Facebookertarmata, attaveqarfiginissaat kissaatigaarput - tamannalu Facebookikkut pinerussaaq, politimesteri tusagassiuutinut nalunaarummi erseqqissaavoq.

Politiit sulinerat tapersersorlugu
- Innuttaasunut sukkanerpaamik oqariartuuteqarniaraangatta, innuttaasut amerlasuut malinnaasut sekuntit arlaqanngitsut atorlugit angummassiffigisinnaassallugit neriuutigaarput.

- Malinnaasut amerlanissaat qulakkeerniarlugu soorunami saqqummiiffigisassavagut. Taamaattumik oqaluttuat oqinnerit, kiisalu 'maanna pisunik ilisimatitsinernik' - imaluunniit nalunaarutinik - assersuutigalugu pinerluuteqartumik ujaasinermi, imaluunniit annaassiniaanermik ingerlataqarutta nalunaarutigisarsinnaavagut, politimesteri ilanngullugu oqarpoq.

Ammasuuneq
Facebookimi qupperneq politiit sulinerannut ingammik tapiliutaassasoq, kisianni aamma politiit sulinerannik ammasumik takutitsillunilu sulilersussanik pilerisaarissasoq, Kalaallit Nunaanni Politiit naqissuserpaat.

- Innuttaasut isaat siutaallu ikiortigigutsigit, pinerluttuliornerit amerlanerusut pinngitsoortissinnaallugit imaluunniit suliarisinnaallugit misilittakkatigut ilisimavarput. Tamatumunngalu Facebook aamma ikiuutaassaaq, politimesteri oqarpoq.