ilinniarfiit

Eqqumiitsuliornermik Ilinniarfiup nuunneqarniarnera Ane Hansenip nuannaarutigaa

Kommune Qeqertalimmi borgmesterip ilinniarfik nuunneqassappat, Eqqumiitsuliornermik Ilinniarfimmut Aasiannullu periarfissanik takuvoq

Naalakkersuisunit Eqqumiitsuliornermik Ilinniarfiup Nuummiit Aasiannut nuunniarneqarnera, Eqqumiitsuliortut peqatigiiffianni EPI-mi qiimmatsatsinngilaq. Aasianni najugaqaraanni aamma Kommune Qeqertalimmi borgmesteriugaanni tamanna allatut isikkoqarpoq. Ane Hansenip (IA) tupaallannanngitsumik ilinniarfik tikilluaqquaa.

Atuaruk: Kajumissaarut: Eqqumiitsuliornermut ilinniarfiup nuunneqarnissaa nalilersoqqinneqarli

- Eqqumiitsuliornermi avatagiisigissarpugut, Aasiaat qangaaniilli sinerissamiit ilinniartunik kateriffiuvoq maannalu Avannaani Ilinniarnertuungorniarfiulluni, taamammallu kulturikkut pingorartitsinermi katersuuffiuvoq siammartiteriffiullunilu, Ane Hansen aamma Timi Tarnilu ataatsimiititaliap siulittaasua, Kristian Jeremiassen (IA), peqatigalugu tusagassiuutinut nalunaarummi allapput.

Pinngortitaq avatangiisillu najukkami eqqumiitsuliortunut isumassarsiorfiusinnaasut, taakku naalakkersuinermik suliallit marluk isumaqarput. Nuunneqarneralu piviusunngortinneqassappat, ilinniarfiup ineriartortinnissaanut piareersimapput.

Atuaruk: Ilinniarfiit nuunneqarnissaannut pilersaarut nanginneqarpoq

- Eqqumiitsuliornermik ilinniarfiup annertusarneqarsinnaaneranut atatillugu isumassanik aamma peqarpugut, soorlu assersuutigiinnarlugu nipilersornermik ilinniarfik siunissaq ungasinnerusoq eqqarsaatigalugu periarfissaqarluarnera takusinnaavarput. Kommune Qeqertalimmi nipilersornikkut taalliornikkullu piginnaasaqarluartunik peqarpugut tamakkualu atorluarneqarsinnaanerat aamma takorloorsinnaavarput, tusagassiuutinut nalunaarummi oqaatigineqarpoq.

Atuaruk: Suliffeqarfiit nussorneqarnerinut Asii akerliuvoq

Eqqumiitsuliorneq aamma kulturi kommunimut nutaamut pilersinneqartumut pingaaruteqarluinnartut, taakku marluk naqissusiipput, tamannalu pissutigalugu eqqumiitsuliornermut timersornermullu ineriartortitsisussamik ataatsimiititaliortoqarsimavoq.

- Kommunit allat suleqatiginerisigut kiisalu nunat avannaamioqatigisat kiisalu naggueqatigisavut minnerunngitsumillu nunarsuarmioqataanerup periarfissanik assigiinngitsunik pissaqarluarnera alakkaamaneqarsinnaanera takusinnaalluarparput.

Powered by Labrador CMS