Enoksen erseqqissaasoq: Nutserititsinermi suliassat inissikkusuppakka
Inatsisartut siulittaasuat Hans Enoksen tallimanngormat tusagassiorfinnut erseqqissaalluni nalunaaruteqarpoq, oqaatsit pillugit nalunaaruteqarnermini nutserinissamut suliassat inissinneqarnissaat nalilersortikkusussimallugu
AG aviisip pingasunngormat allaaseraa, Inatsisartunut siulittaasunngorlaaq Hans Enoksen Partii Naleqqameersoq Inatsisartut nutaamik suleriaaseqarlernissaat oqallisigisikkusullugu.
- Namminersorneq pillugu inatsimmi allassimavoq kalaallit oqaasii Kalaallit Nunaanni oqaatsini pingaarnersaasut. Ajoraluartumik
pissutsit imaapput Inatsisartunut siunnersuut oqaluuserisassanut ilanngunneqarsinnaanani siunnersuut qallunaatuumut nutserneqarsimanngippat. Ilumoorsinnaanngillaq Inatsisartut taamatut atugassaqartinneqarnissaat. Tamanna Inatsisartuni partiit allat peqatigalugit qaqilerniarpara, Hans Enoksen AG aviisimut oqarpoq.
Maanna Hans Enoksen Inatsisartut Siulittaasoqarfianniit tusagassiuutinut nalunaaruteqarpoq, Inatsisartut kalaallisuinnaq sulilernissaat oqaatigisimanagu.
- Akerlianik isumaqarpunga nutsigassatigut suliassat kikkunnit isumagineqarnissaat nalilersorneqartariaqartoq – tassa suliassaq tamanna Inatsisartunut ilaasortaniissanersoq, allattoqarfimmiissanersoq imaluunniit allatut
aaqqinneqarsinnaanersoq. Apeqqut tamanna kissaatigaara Inatsisartut
Siulittaasoqarfianni oqallisigeqqinneqassasoq, Hans Enoksen Inatsisartunut Siulittaasuattut Inatsisartuni kalaallisuinnaq oqalunnissamik kissaateqarnerarlugu isummertoqarnerata kingorna, tallimanngormat allappoq.
- Taamaattumik Inatsisartut suliassaminnik ingerlatsinissaminnut sapinngisamik pitsaanerpaanik killiliussatigut atugassaqartinneqarnissaat qanoq qulakkeerneqarsinnaanersoq pillugu inerititaqarfiusumik oqallinnissaq qilanaaraara, Hans Enoksen naggasiivoq.