Enoksen: Nutserinissamut piumasaqaatinik annikillisaaniartoq
Inatsartut siulittaasuata Hans Enoksenip Inatsisartuni suleriaatsimik nutaamik eqqusseruppoq. Tassani siunnersuutit qallunaatut nutserneqassaassallutik.
- Namminersorneq pillugu inatsimmi allassimavoq kalaallit oqaasii Kalaallit Nunaanni oqaatsini pingaarnersaasut. Ajoraluartumik
pissutsit imaapput Inatsisartunut siunnersuut oqaluuserisassanut ilanngunneqarsinnaanani siunnersuut qallunaatuumut nutserneqarsimanngippat. Ilumoorsinnaanngillaq Inatsisartut taamatut atugassaqartinneqarnissaat. Tamanna Inatsisartuni partiit allat peqatigalugit qaqilerniarpara, Hans Enoksen AG aviisimut oqarpoq
“Tamanna ajorluinnarpoq”
Suleqatigiissitsisuneersoq Tillie Martinussen isumaqarpoq, Hans Enoksenip anguniakkaminik iluatsitsissaguni inuit pisinnaatitaaffiinik unioqqutitsinerussasoq.
- Oqaatsit pillugit tulluartumik ikaarsaariaataasinnaasumik aaqqiissuteqartoqanngitsorluunniit, Kalaallit Nunaanni qallunaatut oqaasillit tamaasa mattunniarunarpai. Tamanna ajorluinnarpoq, Tillie Martinussen, inuit pisinnaatitaaffiinik unioqqutitsisoqarnissaanik isumaqartoq, erseqqissaavoq.
- Piffissami nunarsuarmioqataanitsinnik takutsitsisariaqarnitsinni tamanna naapertuutinngilluinnarpoq, Tillie Martinussen oqarpoq.
Partiit ataasiakkaat Inatsisartuni ilaasortaatitallit nutserinissamut akissaqarnissaat pillugupartiinut tapiissutinik pissarsisarput.
Nunat Avannarliit Killiit Siunnersuisoqatigiivi
Hans Enoksenilu AG aviisimi allamik aamma siunnersuuteqarpoq. Taanna isumaqarpoq Nunat Avannarliit Killiit Siunnersuisoqatigiivisa ataatsimiinneri Inatsisartunut akornusiisariaqanngitsut. Inatsisartuni ilaasortat Nunat Avannarliit Killiit Siunnersuisoqatigiivini ataatsimeeqataasarnerat peqqutigalugu Inatsisartut ataatsimiinnissaat sapaatit akunneri marluk angullugit ataatsimiinnissat aalajangersarneqartarput.
- Aningaasarpassuit atorneqartarput Inatsisartuni ilaasortat Nuup avataani najugallit Inatsisartunut ataatsimiigiarnerannut, nunat avannarliit killiit siunnersuisooqatigiivisa ataatsimiinneranni aningaasartuutit taakku ingerlaannartarput Inatsisartuni ataatsimiinneq kipitikkallarneqaraluarpalluunniit, Hans Enoksen oqarpoq.
Inatsisartut siulittaasortaavisa Hans Enoksenip apeqqarissaarfigineqarnera AG aviisimi atuaruk. Aviisi uani pisiassaavoq: