Folketingi
Doris Jakobsenip DF-mik siorasaarut peqqissimissutiginngilaa
Siumumit Folketingimut ilaasortaasimasoq, Doris Jakobsen, Folketingimut qineqqusaartoqarnerani Inuit Ataqatigiinnik taasineq Dansk Folkepartimik taasinerussasoq oqaaseqarsimanini peqqissimissutiginngilaa
Folketingimut 18. juni qinersisoqarnissaa sioqqullugu qineqqusaartoqarnerani, Doris Jakobsenip Inuit Ataqatigiinnik taasineq Dansk Folkepartimik taasinerussasoq oqaatigaa. Kisianni Doris Jakobsenip partiiata, Siumup, Dansk Folkepartiimeersoq Pia Kjærsgaard Folketingimi siulittaasunngornera tallimanngornermi taperserpaa.
Atuaruk: Siumumit taperserneqarluni: Pia Kjærsgaard Folketingimi siulittaasunngorpoq
- Folketingimut qinersisoqarnissaa sioqqullugu qineqqusaartoqarnerani, Inuit Ataqatigiinnik taasineq Dansk Folkepartimik taasinerussasoq oqaaseqarnerit, maanna Siumut Dansk Folkepartimik taperseereernerata kingorna peqqissimissutigaajuk?
- Naamik, peqqissimissutiginngilara. Isumaqarama sunniuteqarnissap ujartorneqarnissaa pingaarnerusoq, akerliuniaannarluni akerliunerminngaanniit, Doris Jakobsen oqarpoq.
Taassuma nassuiaatigaa, aamma Danmarkimi amerlanerussuteqartut ataqqineqartariaqartut, kalaallillu soqutigisaannut sunniuteqarnissaq qulakkeerlugu.
Dansk Folkepartiimeersoq Pia Kjærsgaard, Folketingimut siulittaasussatut kisiartaalluni qinigassanngortippoq.
Siumup Folketingimut ilaasortaatitaata, Aleqa Hammondip, Dansk Folkepartiimeersup Pia Kjærsgaardip Folketingimi siulittaasunngornissaa tallimanngornermi taperserpaa.