Siumumit taperserneqarluni: Pia Kjærsgaard Folketingimi siulittaasunngorpoq

Dansk Folkepartimeersoq Pia Kjærsgaard ullumi tallimanngornermi Folketingimi siulittaasutut qinerneqarpoq. Taassuma kingoraarpaa Mogens Lykketoft, Socialdemokraterne, arnanilu siullersaalluni folketingimi siulittaasunngorpoq.

Folketingilli siulittaasua Folketingimi ataatsimoorfiusussaagaluartoq folketingimut ilaasortat isumaqatigiinngditsut Pia Kjærsgaard qinerpaat.

Siulittaasortaanngortitsisut tassaapput partiit talerperliit sisamat kiisalu partiit illua'tungiluttut Socialdemokratit Siumullu.

Enhedslisten aamma Alternativet akerliullutik taasipput, SF aamma De Radikale taasinngillat.

Folketingip siulittaasua arnaq siulleq

Enhedslisten taasisoqarnissaanik piumasaqarsimavoq, pissutigalugu SF-itulli nalunaarsimagami qinersinermi Pia Kjærsgaard tapersersorniarnagu. Taasinermi 87-it Pia Kjærsgaardimik taasipput, 16-it akerliullutik taasillutik arfineq-pingasullu isumaqataallutik isumaqataanatilluunniit taasillutik.

Oqalugiarnermini siullermi Pia Kjærsgaardip neriorsuutigaa Folketingi tamaat katersortinniarniarlugu.

– Folketingimut tamarmut siulittaasuuniassaanga. Kikkunnut tamanut, partiimit suminngaanneersuunersoq apeqqutaatinnagu sinniisuussaanga, Pia Kjærsgaard oqarpoq.

Pia Kjærsgaard tassa arnani siullersaalluni Folketingimi siulittaasunngortoq Danmarki siusinnerusukkut arnamik siulittaasoqarsimavoq, qanga Landsting-eqarallarmat.

Taanna tassaavoq Ingeborg Hansen, Socialdemokratineersoq, taannalu 1950-imi Landstingimi siulittaasutut qinigaavoq. Taamaasilluni Ingeborg Hansen nunarsuarmi inatsisartuni siullersaalluni siulittaasuusimavoq.

Siumup Folketingimut ilaasortaatitaanut Aleqa Hammondimut, maanna Sermitsiaq.AG oqaaseqartitsinissamik anguniagaqarpoq.