oqallinneq

DF-imi oqaaseqartartoq: Kalaallit Nunaat aningaasaqarnikkut ajalusuulerpoq

Nutaanik pingasunik mittarfiliorniarneq Kalaallit Nunaata aningaasaqarneranut ajalusoortitsiartoqataapput, Søren Espersen (DF) oqarpoq.

Namminersorlutik Oqartussat inuiaqatigiinni unammilligassat iluarsinissaannut piumassutsimik aamma piginnaassutsinik amigaateqarput, taamaattoqarneranilu naalakkersuinikkut suliallit siuttuisa namminiilivinnissaq anguniarlugu nukissatik tamaasa atorpaat.

Dansk Folkepartip Kalaallit Nunaat pillugu oqaaseqartartua, Søren Espersen, tallimanngornermi Folketingimi apeqquteqaat naapertorlugu oqallinnermi taama oqarpoq.

Søren Espersenip tassani statsminister Lars Løkke Rasmussen (V) kalaallit namminiilivinnissamut suliniuteqarnerat nunallu aningaasaqarnera pillugu paasissutisseeqqunikuuaa.

DF-imi oqaaseqartartup Kalaallit Nunaat ernumassutigigamiuk taamaaliorpoq.

Atuaruk: Løkke: Kalaallit Nunaat namminersortoq aningaasaqarnikkut namminiissaaq

- Innuttaasut 45.000-iinnaat tassani pineqarput. Kalaallit Nunaat kunngeqarfimmut Danmarkimut ilaavoq, taamatullu Tunngaviusumik Inatsimmut ilaalluni.

- Kalaallit Nunaat Folketingimi sinniisoqarpoq, Kalaallit Nunaanniittut tamarmik danskisut innuttaassuseqarput, danskillu passiannik pissarsisinnaallutik.

- Taamaammat folketingimi uagut ilaasortatut pisinnaatitaaffeqaannarata, aamma Kalaallit Nunaat aningaasaqarnikkut ajalusuulertoq aamma inuuniarnikkut ajornartorsiortoqalersoq isigigutsigu qisuariarnissamut pisussaaffeqarpugut, Søren Espersen tallimanngornermi oqallinnermi oqarpoq.

Kalaallit Nunaanni mittarfiit pingasut 4 milliardit koruuninik akilimmik sanaartorneqartussat tamanna pilertortikkaat, taanna ilaatigut isumaqarpoq.

Søren Espersenip taamaattumik kalaallit namminiilivinnissamik takorluugaqarnerat isornartorsiorpaa, naalagaaffiullu tapiissutaanik pisartagaqanngikkuni nuna nammineersinnaanngitsoq oqaatigalugu.

- Naalagaaffiup tapiissutaanik nuna pisartagaqaraluarluni seeqqummereerpoq, Kalaallit Nunaatalu aningaasaqarnermut siunnersuisoqatigiivisa missiliorpaa, ukiut marluk tulliuttut ingerlanerini missingersuutitigut 1 milliardinik amerlanerusunik pitsanngorsaasoqassasoq (sipaarniutit, aaqq.).

- Danmarkimi 100 milldiardit koruuninik nassaarnissatsinnut tamanna assersuunneqarsinnaavoq. Taakku amerlasoorujussuupput, Søren Espersen oqarpoq.

Kalaallit naalakkersuinikkut suliaqartut ajornartorsiutinik isiginninngitsuusaartutut oqaatigai.

- Aaqqissuusseqqinnernik annertuunik pitsanngorsaanernik ulapputtut isumaqartoqarsinnaavoq.

- Kisianni taamaanngilaq, kalaallit naalakkersuinikkut suliaqartut tamakkununnga piffissaqanngillat. Taakku politikkikkut annerusumik pilersaaruteqarput, tassa namminiilivinnissaq, Søren Espersen oqarpoq.

Powered by Labrador CMS