EU
Demokraatit: EU pillugu oqallinneq ammaqqittariaqarpoq
Partiip talerperliuniap Sulisitsisut siulittaasuat Henrik Leth EU-mut ilaasortanngoqqinnissamik oqariartuuteqarneranut tapersersorpaa. Partiimi siulittaasup tulliata Justus Hansenip siunnersuutigaa ilaasortaanerup pitsaaqqutai ajoqutaalu qulaajarneqassasut
Paqumisunneq taamaatittariaqarpoq oqaluuseqqilerlugulu Kalaallit Nunaat EU-mut iseqqikkuni annertunermik iluaquserneqassanersoq maannakkutut attuumassuteqartutut inissisimaneq qimallugu.
Taama Demokraatit oqarput, Polar Seafoodimi siulersuisuni siulittaasoq Kalaallillu Nunaanni Sulisitsisuni siulittaasoq Henrik Leth sapaatip akunnerani kingullermi EU pillugu oqallissaarummik oqaaseqarmat.
Iluaqutissarpassuit
Tikkuarpaa Kalaallit Nunaat ingammik aalisarnikkut EU-p iluani nunanut allanut ilanngaaserinikkut isumaqatigiissummi ilaassuuppat iluaqutissartaqassagaluartoq.
- Inatsisartuni gruppimi tamanna oqaluuseraarput, isumaqarpugullu ilaasortaaneq toqqaannartumik iluaqutissartaqarsinnaasoq. Uani eqqarsaatigaakka aningaasaqarneq ineriartornerlu assersuutigalugu atortulersuuteqarnikkut. Nunap immikkoortuatut tapiissigineqarsinnaavugut.
- Atuarfeqarnikkut EU-mik ilaasortaanermut aamma iluaqutissartaqarpoq, Demokraatit siulittasuata tullia Justus Hansen oqarpoq.
Atuaruk: EU-Kommissionip Issittoq pillugu politikki akueraa
Inuussutissarsiornermut periarfissat
Tamatuma saniatigut inuussutissarsiornikkut nutaanik periarfissaqarpoq Kalaallit Nunaat kisimiitillugu aallartikkuminaatsunik.
- Takornariaqarneq eqqartortuarparput, isumaqarpungalu takornariaqarnikkut aamma EU-mi ilaasortaaneq iluaqutigineqarsinnaasoq. EU-mi innuttaasut aamma ajornannginnerusumik nunatsinnut angalasinnaanngussapput, EU-llu toqqaannartumik mittarfiliornitsinni atortulersuinitsinnilu ikiorsinnaavaatigut, siulittaasup tullia AG-mut oqarpoq.
Allaaserisaq tamaat AG-mi uani sapaatip akunnerani saqqummertumi atuaruk, taanna ullumikkut pisiniarfinni pisiarisinnaavat. Aviisi aamma uani pisiarineqarsinnaavoq: