EU-Kommissionip Issittoq pillugu politikki akueraa

EU-Kommissionip ullumikkut EU-p ataqatigiimmik Issittumut politikkissaanik siunnersuutini saqqummiuppaa.

Danmarkip nunanut allanut ministeriata, Kristian Jensenip (V), tamanna nuannaarutigaa.

- Kommissionip Issittumut politikkimik ataqatigiissumik akuersinera pitsassuuvoq, politikeri tusagassiuutinut nalunaarummi oqarpoq.

- Danmarkip sivisuumik sulissutigaa, EU Issittumi pimoorussinerusariaqarnera, naammagisimaarparalu naalagaaffiup Danmarkip ilungersuussai amerlasuut ilanngunneqarnissaat aalajangiunneqarsimammata.

Kristian Jensen eqikkaavoq, EU qanoq ililluni piujuaannartitsisumik ineriartortitsisinnaanersoq, aningaasaqarnikkut ineriartortitsisinnaanersoq, Danmarki iliuusussatut pilersaarummik kissaateqarsimasoq, aamma upperaa issittumi EU-p iliuusissaani nutaami ilisimatusartoqarnerulersinnaassasoq.

Qallunaat ilungersuutaat alla tassaavoq, nalunaarasuartaatikkut atassuteqarneq aamma qaammataasat, taakku imaatigut silaannakkullu angallannermut qularnaatsumut, ilisimatusarnermut aamma Issittumi najugaqarfinnut mikisunut internetimut pitsaanerusumut pingaartuupput, Nunanut allanut ministeriaqarfik allappoq.

- Soorunami politikki iliuusinngortinnissaanut, Issittumi suliniutinut aamma aningaasaliinernut Kommissioni ikiorusupparput.

- Kunngeqarfimmut aamma pingaartuuvoq, EU nunap ilaani sananeqaatit aamma Issittumi innuttaasut ataqqillugit pissasoq, nunanut allanut ministeri Kristian Jensen oqarpoq.

Kommissionip ataatsimoorussamik Europa-Parlamentimut nalunaarutaa, ''EU-p Issittumut politikkia ataatsimoortoq'', qaammatini aggertuni oqaluuserineqarnissaa naatsorsuutigineqarpoq.

Naalagaaffinni EU-mut ilaasortaasunut Issittumi naalagaaffeqarteqartuni kisiartaalluni, Danmarkip Nunarput aamma Savalimmiut peqatigalugu Kunngeqarfiup salliutitaat ilannguppai.