Birna Brjánsdóttir
Birnamut toqutsisutut pasineqartut aqagu killisiorneqaqqissapput
Birna Brjánsdóttirip ippassaq nassaarineqarnerata kingorna, misissuineq nutaamik ingerlaqqippoq
Polar Nanormi inuttat marluk toqutsisutut pasineqarlutik tigummigallarneqartut ullumikkut killisiorneqassanngillat.
Tamanna tusarfinnit tutsuiginartunit mbl.is-ip paasivaa.
Birna Brjánsdóttirip ippassaq nassaarineqarnerata kingorna taamaalillutik killisiorneqanngillat.
Atuaruk: Birna nassaarineqarpoq
Toqqutigineqartoq paasineqassasoq
Toqunneqarsimanissaa politiit ilimagaat, kisianni sunarpiaq toqqutigisimaneraa pinerlussimanermi nakorsat paasiniaasarnerat utaqqeqqaarpaat.
Mbli.is naapertorlugu pasineqartut apersoqqinnginnerini politiit paasissutissanik amerlanerusunik katerseqqaarniarput.
Taakku immikkoortitaallutik paarnaarussivimmi tigummigallarneqarput.
Toqusumik misissueqqissaarneq
Tamatuma saniatigut misissuinermi aqutsisup Grímur Grímssonip Islandimi tusagassiorfinnut nassuiaatigaa, Birna Brjánsdóttirip nanineqarnerata kingorna suliaq ingerlateqqinneqartoq.
Ippassaq tikillugu ujaasineq aallunneqarpoq, maannakkullu toqutsinermi suliatut nalinginnaasutut ingerlanneqarpoq, Grímur Grímsson mbli.is naapertorlugu oqarpoq.
Atuaruk: Qulimiguullip Birna Brjánsdottirip timaa sissami nassaara
Biilimi ajoqusernerit
Pasineqartut biili Kia aappaluttoq attartorsimasaat, arfininngornermi ullaap tungaani sukkorpiaq ingerlaarsimanersoq politiit suli paasiniarpaat.
Biili ajoqusernertarqartoq politiit ullumi uppernarsarpaat.
Birna Brjánsdóttirip ujarneqarnerani inuppassuit peqataasimasut politiit tusagassiuutinut nalunaarummi qujaffigaat.