Qulimiguullip Birna Brjánsdottirip timaa sissami nassaara

Ullut arfineq-pingasut kingulliit ilimagineqartoq maanna piviusunngorpoq.

20-nik ukiulik Birna Brjánsdóttir toqungasoq nassaarineqarpoq. Toqutaasimasinnaaneralu ilimanaateqartoq islandimi nutaarsiassaqartitsiviit allaaseraat.

Sinerissami alapernaarsuisut qulimiguuliata sissami Selvogsvitimi Reykjavikip kujataatungaaniittumi ujaarineqartup timaa islandip nalunaaqutaa malillugit ataatsimut siumorneqarpoq.

Maannalu nassaarineqartup qanoq ililluni toqusimanera politiinit misissorneqartussanngorpoq. Pineqartorlu toqutaasimasoq politiinit ilimagilluinnarneqartoq mbl.is-ip allaaseraa.

Arnap inuusuttup qanoq isilluni sissamut pisimanera aamma misissoqqissaarneqassaaq.

Politiit Birna Brjánsdóttiri biilini aappaluttuni Kia Rionik meqqilinni ilaasimasoq uppernarsaatinik nassaartoqarsimanera siusinnerusukkut oqaatigereerpaat. Biili Polar Nanumi inuttat piffissami tassani attartorsimasaanni.

Biilit pineqartut sapaatip akunnerata siuliani arfininngornermi ullaakkut arfineq-marluk qulingiluallu akornanni sumiissimasinnaanerinik ilisimasaqartunik politiit paasissutissanik pissarserusullutik nalunaaruteqartareerput.

Birna Brjánsdóttir nalunaaqutaq 5.25 ulloq taanna periarfeerunneqarnerani filmiliutini nakkutiginnissutini takuneqarpoq. Tassa uummatillugu takuneqarnera kingulleq.

Taassuma kingorna periarfeerunneqartup mobilia talittarfimmi Hafnafjördurimiissimasoq, Polar Nanup tulaqqaffiani, politiit uppernarsarpaat.

Angutit marluk toqutsisimasutut pasineqartut suli pinngitsuunerarput.