Arctic Winter Games
AWG-mi kajumissutsiminnik suleqataasut pikkorissarnerat maanna aallartippoq
Pikkorissartitsinissat amerlasuut januaarimi februaarimilu ingerlanneqartussat pilersaarutigineqarput, tuluit oqaasiinik, kiffartuussinermik, eqqiluisaarnermik aamma ikiueqqaarnermik pikkorissartitsinissanut arlaqartunut Nuummi innuttaasut peqataanissaminnut periarfissaqassallutik
Arctic Winter Games 2016 qaammatit marluinnaat qaangiuppata aallartinneqassaaq. Kajumissutsiminnik suleqataasussat suliassanut annertuunut piareersarniarlugit pissanganartunik, naleqqussakkanik aammalu aaqqissuulluakkanik pikkorissartinneqarnissaannik suliaqarnissamik ukioq nutaaq aallartinneqarpoq, AWG2016 tusagassiuutinut nalunaarummi ilisimatitsivoq.
Pikkorissartitsinerit tamarmik akeqanngillat, piumasaqaatituarlu tassaavoq kajumissutsimik suleqataasussatut nalunaarsimanissaq, aammalu Arctic Winter Games 2016-ip ingerlanneqarnerata nalaani kajumissutsimik suleqataasutut ikiuunnissaq.
Aamma atuaruk: AWG ingerlanneqarnerani Rotary Nuuk ataatsimoorfioqqissaaq
Suleqatit aamma aningaasaliisut
- Pikkorissartitsinissat piviusunngortinissaannut suleqatigisarpassuatta tapersersuisorpassuattalu tapertaanerat nuannaarutigisorujussuuarput. Tuluit oqaasiinik pikkorissartitsinissat Niuernermik Ilinniarfik, Københavnimi Amerikamiut Ambassadeannit tapersersorneqartoq, suleqatigalugu piviusunngorput, AWG2016-imi suliniutinut siunnersorti Inger Erikseni oqarpoq.
Taassuma aamma oqaatigaa, kiffartuussinermik pikkorissartitsinissat Tele-Post suleqatigalugu piviusunngorput, taakku kiffartuussinermik suliaqartutut sinniisuutitaat AWG2016-imi kiffartuussinermik pikkorissartitsinermik ingerlataqassallutik, suliffeqarfillu Mentorixi suliniutinik suliaqartarnermik kajumissutsiminnik suleqataasunut pikkorissartitsinernik arlalinnik ingerlataqarluni.
Atuaruk: AWG kajumissutsiminnik suleqataasussanik suli amigaateqarpoq
Inuusuttut 30-t sinerissamit
Pikkorissartitsinerit tamanut ammasut saniatigut immikkut inuusuttunut sinniisuutitanut pikkorissartitsisoqassaaq (Inuusuit Kivitsisussat), inuusuttut 30-t Kalaallit Nunaanni sumiiffinni assigiinngitsuneersut peqataaffigisassaannik.
- Inuusuttut taakku kajumissutsimik suliaqartarnermik, suliniutinik ingerlatsinermik, kiffartuussinermik, issittumi kulturimik, inuussutissarsiornermik, tusagassiuutilerinermik allarpassuarnillu ilinniartinneqassapput. Pikkorissartitsineq taanna Royal Greenland-imit aningaasaliiffigineqarpoq, AWG2016-imi suliniutinut siunnersorti Inger Erikseni oqarpoq.
Kajumissutsiminnik suleqataasut, pikkorissartitsinernullu peqataasut tamarmik atorsinnaasaminnik misilittakkanillu inuiaqatigiinnut pingaarutilimmik malunniuttussanik pissarsissapput, tusagassiuutini nalunaarummi taama oqaatigineqarpoq.
Aamma atuaruk: Kajumissutsiminnik sulisunut pikkorissartitsinermik neqeroortut